سینیٹر فیصل واوڈا نے پاکستان تحریک انصاف ( پی ٹی آئی ) کی قیادت سے متعلق اہم پیش گوئی کر دی۔
اسلام آباد میں میڈیا سے گفتگو کرتے ہوئے سینیٹر فیصل واوڈا کا کہنا تھا کہ پی ٹی آئی کے وائس چیئرمین شاہ محمود قریشی کا چہرہ دیکھتے رہا کریں وہ ہمارے وزیر خارجہ رہ چکے ہیں۔
فیصل واوڈا کا کہنا تھا کہ خیبر پختونخوا میں میں سرکاری فنڈز سے 10 فیصد مسلح گروہوں کو جانے کی بات کی تائید کرتا ہوں اور اس حوالے سے سربراہ جمعیت علماء اسلام ( جے یو آئی ) مولانا فضل الرحمان کا بیان درست ہے۔
انہوں نے کہا کہ ایک صوبے کا معاملہ نہیں ، تمام صوبوں کے فنڈز دیکھیں تو بڑا بڑا فنڈا نکلے گا۔
ان کا کہنا تھا کہ خیبرپختونخوا اور پی ٹی آئی قیادت بانی پی ٹی آئی کو جیل میں رکھنے میں کامیاب ہوگئی ہے اور کے پی میں پی ٹی والی والے اپنے اقتدار کے مزے لوٹتے ہیں اور لوٹتے رہیں گے۔
فیصل واوڈا کا کہنا تھا کہ جو فیل صوبے ہوتے ہیں جہاں کوئی منصوبہ بندی نہ ہو وہاں یہی تباہی ہوتی ہے۔
انہوں نے کہا کہ تحریک انصاف والے نعرہ لگاتے تھے سارے چور ہیں سارے بے ایمان ہیں لیکن اب خیبر پختونخوا میں بھی بے ایمانی چل رہی ہے اور سینٹ کی سیٹوں پر نورا کشتی ہوئی۔
ان کا کہنا تھا کہ پاک فوج نے 14 اگست کو بلوچستان میں تباہی سے بچا لیا اور فیلڈ مارشل عاصم منیر کی سربراہی میں پاک فوج ملک کو بچاتی رہے گی جبکہ دہشت گردوں کے خلاف ملک میں آپریشن رکے گا نہیں بلکہ تیز ہوگا اور جو اس تسلسل کے بیچ میں آئے گا جتنا بڑا طرم خان ہوگا رگڑ دیا جائے گا۔
