استحکام پاکستان پارٹی ( آئی پی پی ) کے رکن صوبائی اسمبلی شعیب صدیقی نے پنجاب اسمبلی میں ایک قرارداد جمع کرائی جس میں فیلڈ مارشل جنرل سید عاصم منیر کے کامیاب امریکی دورے اور بھارتی دہشت گردی کے عزائم بے نقاب کرنے پر خراج تحسین پیش کیا گیا ہے۔
قرارداد کے متن کے مطابق ایوان فیلڈ مارشل عاصم منیر کی کامیاب ملٹری ڈپلومیسی کو سراہتا ہے جنہوں نے بھارت کے دہشت گردانہ چہرے کو عالمی سطح پر بے نقاب کر کے ملکی وقار کو بلند کیا۔
قرارداد میں کہا گیا کہ بلوچستان لبریشن آرمی (بی ایل اے) اور مجید بریگیڈ کو عالمی دہشت گرد تنظیمیں قرار دینا فیلڈ مارشل کی کاوشوں کا ثمر ہے۔
لازمی پڑھیں۔ فیلڈ مارشل عاصم منیر کا امریکہ میں شاندار استقبال، بھارت میں تشویش
قرارداد میں بھارت کی جانب سے پاکستان میں دہشت گردی کی سرپرستی کے موقف کی عالمی سطح پر توثیق کو بڑی کامیابی قرار دیا گیا۔
متن کے مطابق صوبائی اسمبلی پنجاب کا ایوان سمجھتا ہے کہ" را "کے فتنہ الہندوستان کے ساتھ روابط ہیں اور بھارت پاکستان میں دہشتگردانہ کارروائیوں کیلئے فتنہ الہندوستان کو مالی امداد فراہم کرتا ہے جبکہ کلبھوشن یادیو کی گرفتاری پاکستان میں دہشتگردوں کی بھارتی سرپرستی کا واضح ثبوت ہے۔
قرارداد میں کہا گیا کہ بھارت کے دہشت گردانہ عزائم نہ صرف خطے بلکہ عالمی امن کے لیے بھی خطرہ ہیں۔
قرارداد کے مطابق پنجاب اسمبلی کا ایوان فیلڈ مارشل سید عاصم منیر کوکامیاب امریکی دورہ پر مبارکباد پیش کرتا ہے اور پاکستان میں دہشتگردی کے تناظرمیں بھارت کا چہرہ بے نقاب کرنا نا گزیر تھا جبکہ یہ ایوان دعا گو ہے اللہ تعالیٰ پاکستان کو ہمیشہ اندرونی وبیرونی سازشوں سے محفوظ رکھے۔
