پاکستان نے غزہ کے مصیبت زدہ عوام کے لیے مزید 200 ٹن امدادی سامان دو خصوصی پروازوں کے ذریعے روانہ کردیا۔
نیشنل ڈیزاسٹر مینجمنٹ اتھارٹی (این ڈی ایم اے) کے ترجمان کے مطابق 17 ویں امدادی کھیپ جس کا وزن 100 ٹن ہے، اسلام آباد سے خصوصی پرواز کے ذریعے غزہ روانہ کی گئی ہے۔
17ویں کھیپ میں 65 ٹن تیار کھانا، 20 ٹن بچوں کے لیے خشک دودھ، 5 ٹن بسکٹس اور 10 ٹن ادویات شامل ہیں۔
ترجمان نے بتایا کہ اگلے چند دنوں میں مزید 100 ٹن امدادی سامان پر مشتمل دوسری پرواز روانہ کی جائے گی جس کے بعد غزہ کے لیے بھیجی گئی مجموعی امداد کا وزن 1,815 ٹن تک پہنچ جائے گا۔
اب تک 17 کھیپوں کے ذریعے 1,715 ٹن امدادی سامان غزہ بھیجا جا چکا ہے۔
امدادی سامان کی روانگی کی تقریب میں نائب وزیراعظم اسحاق ڈار اور چیئرمین این ڈی ایم اے نے بطور مہمان خصوصی شرکت کی۔
