بالی ووڈ کے مسٹر پرفیکشنسٹ عامر خان نے پریس کانفرنس کا اعلان کرکے سوشل میڈیا صارفین اور مداحوں میں ہلچل مچادی۔
سوشل میڈیا پر ایک اناؤنسمنٹ نوٹ وائرل ہورہا ہے جوکہ عامر خان پروڈکشنز کی جانب سے 29 جولائی کو ایک اہم اعلان کیلئے پریس کانفرنس منعقد کرنے سے متعلق ہے، یہ نوٹ سب کی توجہ کا مرکز بن گیا ہے۔
مداحوں اور سوشل میڈیا صارفین نے عامر خان کی تیسری شادی کی چہ مگوئیاں شروع کردی ہیں کیونکہ اس سے قبل اس ہی طرح کی ایک پریس کانفرنس رکھ کر انہوں نے اپنی گرل فرینڈ گوری سے اپنے قریبی تعلقات اور گزشتہ ایک برس سے ساتھ رہنے کے بارے میں اعلان کیا تھا۔
مداحوں کا کہنا ہے کہ اس مرتبہ عامر خان اپنی شادی کا اعلان کرنیوالے ہیں اور وہ اس اعلان کیلئے بے حد پُرجوش ہیں۔ ایک حالیہ انٹرویو میں عامر کا کہنا تھا کہ ’’گوری اور میں ایک سنجیدہ رشتے میں ہیں، دل سے میں اس سے پہلے ہی شادی کرچکا ہوں مگر اب رسمی طور پر شادی کا فیصلہ کرنا باقی ہے‘‘۔
یاد رہے کہ عامر خان اس سے قبل 2 شادیاں کرچکے ہیں جو ناکام رہیں، ان کی پہلی بیوی رینا دتہ جن سے ان کے 2 بچے اور دوسری بیوی معروف فلمساز کرن راؤ تھیں جن سے ان کا ایک بیٹا ہے، تاہم دونوں شادیوں کا انجام طلاق کی صورت میں سامنے آیا۔
