وزیر اعلیٰ پنجاب مریم نواز شریف کی ہدایت پر زرعی گریجویٹس کے لیے انٹرن شپ پروگرام کا دوسرا فیز شروع کر دیا گیا ہے، جس کے تحت 2 ہزار ایگری کلچر گریجوایٹ انٹرنز کو ماہانہ 60 ہزار روپے سکالرشپ دی جائے گی ۔ بی ایس سی ایگریکلچر اور بی ایس سی (آنرز) ایگریکلچرل انجینئرنگ کرنے والے طلبہ انٹر ن شپ پروگرام کے اہل ہو ں گے ۔
زرعی گریجویٹس اپنے متعلقہ ضلع میں ڈپٹی ڈائریکٹر زراعت کے دفتر میں درخواستیں جمع کرا سکتے ہیں۔ بی ایس سی ایگریکلچر اوربی ایس سی ایگریکلچرل انجینئرنگ گریجویٹس کے لئے ہر ضلع کا کوٹہ مقرر کر دیا گیاہے ،جبکہ پروگرام کے حوالے سے ایگریکلچرل ہیلپ لائن بھی فعال کر دی گئی ہے۔
وزیراعلیٰ مریم نواز شریف نے کہا ہے کہ ایگریکلچرانٹرن شپ پروگرام سے نا صرف کاشتکاروں کی معاونت کی جاتی ہے بلکہ نوجوانوں کوباعزت روزگاربھی مل رہا ہے، پنجاب میں کسان کارڈ پروگرام نے کامیابی کے نئے ریکارڈ قائم کیے ہیں، جبکہ گرین ٹریکٹر اور ٹیوب ویل سولرائزیشن پروگرام بھی کامیابی سے جاری ہیں۔
مریم نواز نے بتایا کہ کاشتکاروں کو تمام سہولتیں ایک ہی چھت تلے فراہم کرنے کیلئے ماڈل ایگری کلچر مال لا رہے ہیں۔
