کراچی کی مقامی عدالت نے کمسن لڑکی سے شادی کرنے پر ملزم ذیشان کی عبوری ضمانت منسوخ کردی۔ عدالتی فیصلہ سنتے ہی ملزم عدالت سے فرار ہوگیا۔
ایڈیشنل ڈسٹرکٹ اینڈسیشن جج ویسٹ کی عدالت میں کمسن لڑکی سے شادی کے مقدمے میں ملزم کی عبوری ضمانت پر سماعت ہوئی۔ عدالت نے ملزم کی عبوری ضمانت منسوخ کی تو ملزم فیصلہ سنتے ہی فرار ہوگیا۔
ایڈووکیٹ مہنازآفریدی کا مؤقف تھا کہ ملزم نے پانچویں کلاس کی بچی سے شادی کی، ملزم کے خلاف سندھ چائلڈ میرج ایکٹ کے تحت مقدمہ درج ہوا۔ عمر کا تعین کرنے کے لیے ٹیسٹ کروایا تو اسکے مطابق بھی یہی عمر ہے۔
مدعی کے وکیل کے مطابق عدالت نے دلائل کو مدنظر رکھتے ہوئے ملزم کی عبوری ضمانت منسوخ کردی۔ ملزم کے خلاف تھانہ مومن آباد میں مقدمہ درج کیا گیا تھا۔
