پاکستان اور عالمی مارکیٹ میں مسلسل چوتھے روز سونے کی قیمت میں اضافہ ہوگیا، فی تولہ سونا 1600 روپے اور فی اونس 16 ڈالر مہنگا ہوگیا۔
آل پاکستان صراف اینڈ جیولرز ایسوسی ایشن سے جاری اعداد و شمار کے مطابق سونے کی فی تولہ قیمت 1600 روپے اضافے سے 3 لاکھ 59 ہزار 700 روپے ہوگئی جبکہ دس گرام سونا 1371 روپے بڑھ کر 3 لاکھ 8 ہزار 384 روپے کا ہوگیا۔
رپورٹ کے مطابق عالمی مارکیٹ میں فی اونس سونا 16 ڈالر مہنگا ہوکر 3 ہزار 372 ڈالر پر پہنچ گیا۔
صراف ایسوسی ایشن کے مطابق پاکستان میں چاندی کی فی تولہ قیمت 65 روپے بڑھ کر 4 ہزار 87 روپے اور عالمی مارکیٹ میں فی اونس نرخ 0.65 ڈالر بڑھ کر 39.03 ڈالر پر پہنچ گئے۔
واضح رہے کہ گزشتہ ہفتے پاکستان اور عالمی مارکیٹ میں سونے کی قیمت میں مسلسل تین روز اضافہ ریکارڈ کیاگیا تھا۔
