سائبر سیکیورٹی ماہرین نے پاکستانی سائبر اسپیس کو درپیش چیلنجز سے نمٹنے کے لئے موثر اور مربوط اقدامات پر زور دیاہے، سابق ڈی جی ایف آئی اے اور سائبر سیکیورٹی ماہر عمار جعفری کہتے ہیں آج صرف فائر وال کے ذریعے سائبرسیکیورٹی خطرات سے نمٹنا ممکن نہیں موثر انٹیلیجنس بھی ضروری ہے ۔
اسلام آباد میں امریکی ادارے اور پائسا کے اشتراک سے’’سائبر سیکیورٹی کانفرنس‘‘ کا انعقاد کیا گیا، حکومت ، مسلح افواج ، ایف آئی اے ، انٹیلیجنس بیورو، نیب، نادرا، پولیس، این ڈی ایم اے ، پی ٹی سی ایل سمیت درجنوں اداروں کے نمائندے شریک ہوئے۔
سائبر سیکیورٹی کے بنیادی ڈھانچے، سمارٹ شہروں میں سیکیورٹی اور پاکستان میں ڈیٹا بیسڈ گڈ گورننس کےموضوعات زیربحث آئے ۔ کانفرنس کےکنوینراور سائبر سیکیورٹی ماہر عمار جعفری نے سائبر کرائمز اور سائبر دہشت گردی کے بڑھتے خطرات کے پیشِ نظر موثر سائبر سیکیورٹی انٹیلیجنس کو ضروری قرار دیا اور اس حوالے سےعوام میں آگاہی پیدا کرنے پر بھی زور دیا ۔
