چینی،گندم اور کھاد سمیت اجناس کی اسمگلنگ روکنےکیلئے حکومت نے بڑا فیصلہ کرلیا۔
رینجرز اور ایف سی کو اسمگلنگ کی روک تھام کے اختیارات تفویض کردیئے گئے،ایف بی آر نے باضابطہ نوٹیفکیشن جاری کردیا،ایف بی آر کی طرف سے جاری کیے گئے نوٹیفکیشن کے مطابق ایف سی اور رینجرزاہلکار بین الصوبائی مشترکہ چیک پوسٹس پر ضروری اشیا کی اسمگلنگ روکنے کی مجاز ہوں گے۔
ڈیوٹی پر تعینات نیم فوجی اہلکار چیک پوسٹوں پر آٹا، گندم، چینی اور کھاد کی سمگلنگ کو روکیں گے۔ ایف سی اور رینجرز بین الاقوامی سرحد کے پچاس کلو میٹر کے اندر علاقوں کی نگرانی کریں گے۔
ایف سی اور رینجرز اہلکار شہری علاقوں،کسٹمز ایریاز و سٹیشنز اور پورٹس پر نگرانی کرنے کے مجاز نہیں ہوں گے۔ نیم فوجی اہلکار بارڈرکسٹمز سٹیشنز، بین الاقوامی ائیرپورٹس اور بانڈڈ وئیرہاوسز پر بھی تعینات نہیں ہوں گے۔
ایف سی و رینجرز اہلکار صرف افغان سرحد کے قریبی شہری علاقوں میں کارروائیاں کرنے کےمجاز ہوں گے۔پاکستان میں اینٹی اسمگلنگ محکمہ کسٹمز کے دائرہ اختیار میں تھا۔
