پاکستان میں پولیو کا ایک اور کیس رپورٹ ہوا ہے جس کے بعد رواں سال 2025 میں پولیو کیسز کی مجموعی تعداد 14 ہوگئی ہے۔
نیشنل ایمرجنسی آپریشن سینٹر (این ای او سی ) کے مطابق نیا کیس خیبرپختونخوا کے ضلع شمالی وزیرستان سے رپورٹ ہوا جہاں 19 ماہ کے بچے میں وائلڈ پولیو وائرس (WPV1) کی تصدیق ہوئی ہے۔
این ای او سی کے مطابق 2025 میں اب تک خیبرپختونخوا سے 8، سندھ سے 4، پنجاب اور گلگت بلتستان سے ایک ایک کیس رپورٹ ہوچکا ہے۔
پولیو کیسز کی تعداد میں اضافے کے پیش نظر شمالی وزیرستان کی 11 یونین کونسلز میں جلد ایک خصوصی انسداد پولیو مہم شروع کرنے کا فیصلہ کیا گیا ہے۔
این ای او سی نے والدین سے اپیل کی ہے کہ وہ اپنے بچوں کو پولیو سے بچاؤ کے قطرے ضرور پلائیں تاکہ اس مہلک بیماری سے تحفظ یقینی بنایا جا سکے۔
