پاور ڈویژن نے کراچی سمیت ملک بھر میں بجلی کے یکساں ٹیرف کے لیے نیشنل الیکٹرک پاور ریگولیٹری اتھارٹی (نیپرا) میں درخواست دائر کر دی ہے۔
نیپرا میں دائر کی گئی درخواست میں آئندہ مالی سال کے لیے بجلی کے بنیادی ٹیرف میں کمی کی تجاویز پیش کی گئی ہیں جس پر سماعت یکم جولائی کو ہوگی۔
گھریلو صارفین کے لیے بنیادی ٹیرف میں فی یونٹ 1.16 روپے تک کمی کا امکان ہے۔
زیادہ سے زیادہ ٹیرف 48.84 روپے سے کم ہو کر 47.69 روپے فی یونٹ تک رہنے کی تجویز ہے جبکہ ماہانہ 50 یونٹ تک استعمال کرنے والے لائف لائن صارفین کے لیے ٹیرف 3.95 روپے فی یونٹ اور 51 سے 100 یونٹ تک استعمال کرنے والوں کے لیے 7.74 روپے فی یونٹ برقرار رکھنے کی تجویز دی گئی ہے۔
پروٹیکٹڈ گھریلو صارفین کے لیے 1 سے 100 یونٹ تک ٹیرف 1.15 روپے کمی کے ساتھ 10.54 روپے فی یونٹ جبکہ 101 سے 200 یونٹ تک 13.01 روپے فی یونٹ تجویز کیا گیا ہے۔
نان پروٹیکٹڈ گھریلو صارفین کے لیے 1 سے 100 یونٹ تک ٹیرف 22.44 روپے، 101 سے 200 یونٹ تک 1.16 روپے کمی کے ساتھ 28.91 روپے، 201 سے 300 یونٹ تک 33.10 روپے، 301 سے 400 یونٹ تک 37.99 روپے، 401 سے 500 یونٹ تک 40.22 روپے، 501 سے 600 یونٹ تک 41.62 روپے، اور 601 سے 700 یونٹ تک 42.76 روپے فی یونٹ تجویز کیا گیا ہے۔
ماہانہ 700 یونٹ سے زائد استعمال کرنے والوں کے لیے ٹیرف 1.15 روپے کمی کے ساتھ 47.69 روپے فی یونٹ تجویز کیا گیا ہے۔
