وفاقی وزیر مملکت برائے پیٹرولیم علی پرویز ملک نے کہا ہے کہ وزیراعظم شہباز شریف نے ایران ، اسرائیل جنگ کے تناظر میں پیٹرولیم مصنوعات کے ذخائر کے جائزے کے لیے ایک کمیٹی تشکیل دی ہے جبکہ وزیر خزانہ کی سربراہی میں قائم اس کمیٹی میں وہ خود، چیئرمین اوگرا، سیکریٹری پیٹرولیم اور دیگر اعلیٰ افسران شامل ہیں۔
وزیر مملکت علی پرویز نے بتایا کہ کمیٹی روزانہ کی بنیاد پر پیٹرولیم ذخائر کا جائزہ لیتی ہے اور ضروری ہدایات جاری کرتی ہے۔
انہوں نے کہا کہ آج بھی ایک جائزہ اجلاس ہوا جس میں طے کیا گیا کہ ملک میں پیٹرولیم مصنوعات کے ذخائر کافی ہیں۔
انہوں نے کہا کہ آبنائے ہرمز کی ممکنہ بندش کی صورت میں پیٹرولیم مصنوعات کی سپلائی کے انتظامات کا جائزہ لیا گیا ہے، اوگرا ریفائنریوں اور آئل مارکیٹنگ کمپنیوں کے اسٹاک کی مسلسل نگرانی کر رہا ہے تاکہ سپلائی چین فعال رکھی جائے۔
علی پرویز نے زور دیا کہ حکومت پیٹرولیم مصنوعات کی سپلائی کو یقینی بنانے کے لیے ہر ممکن کوشش کرے گی۔
انہوں نے بتایا کہ وزیراعظم شہباز شریف خود بھی آنے والے دنوں میں اس حوالے سے جائزہ اجلاس کی صدارت کریں گے۔
