بلاول بھٹو زرداری کا کہنا ہے کہ بھارتی اقدامات علاقائی، عالمی امن و سلامتی کیلئے خطرناک نتائج کا باعث بن سکتے ہیں۔
پاکستان کے سرکاری وفد نے برطانوی پارلیمنٹ میں آل پارٹیز پارلیمانی گروپ کو دوران بریفنگ بتایا کہ شہری آبادی پر بھارتی حملے اور سندھ طاس معاہدے کی یکطرفہ معطلی عالمی قوانین کی خلاف ورزی ہے۔ بھارتی اقدامات علاقائی اور عالمی امن کیلئے خطرناک ہو سکتے ہیں۔
پاکستانی وفد کے سربراہ بلاول بھٹو زرداری نے ویسٹ منسٹر پیلس میں برطانیہ کے آل پارٹیز پارلیمانی گروپ کو بریفنگ دی۔ برطانوی پارلیمنٹرینزکو بھارتی جارحیت اور پہلگام واقعے کے بعد کےاثرات سے آگاہ کیا گیا۔
بلاول بھٹو زرداری نے کہا کہ ہندوستان بغیر کسی جواز اور تحقیقات کے پاکستان پر الزام تراشی کا مرتکب ہوا۔ بھارت نے مصدقہ تحقیقات اور قابل تصدیق شواہد کے بغیر پاکستان پر الزامات لگائے۔ پاکستان نے بے بنیاد بھارتی الزامات کو واضح طور پر مسترد کیا۔
پاکستانی وفد نے کہا کہ ہندوستان کے اقدامات علاقائی اور عالمی امن و سلامتی کیلئے خطرناک نتائج کا باعث بن سکتے ہیں۔ آل پارٹیز پارلیمانی گروپ پاکستان کی چیئرپرسن یاسمین قریشی ایم پی نے وفد کی میزبانی کی۔
