پاک فوج کی ملک کے لئے قربانیاں کسی سے ڈھکی چھپی نہیں۔ فوجی جوان ہر دم ملک کی حفاظت اور بقاء کےلئے اپنی جان قربان کرنے کو تیار رہتے ہیں۔ وطن کیلئے جان کا نذرانہ پیش کرنے والے شہداء کو پوری قوم خراجِ عقیدت پیش کرتی ہے۔
عیدالاضحیٰ کے موقع پر نائیک توقیر عباس شہید کے لواحقین انہیں بہت یاد کر رہے ہیں۔ نائیک توقیر عباس شہید کے اہل خانہ نے فخر اور جذبات سے بھرپور پیغام دیا۔ شہید کی والدہ نے کہا کہ بیٹا بہت فرمانبردار تھا۔ مجھے تھوڑی سی تکلیف ہوتی تو فوراً حاضر ہو جاتا تھا۔ اللہ میرے بیٹے کی شہادت قبول کرے ۔ شہادت کو چار ماہ بیت گئے، لیکن ہم اسے پل بھر کے لیے بھی نہیں بھولے۔
شہید کے بھائی نے کہا کہ توقیر عباس بہت اچھے اخلاق کا مالک تھا اور والدین کا بہت احترام کرتا تھا۔ بھائی گزشتہ دو عیدیں گھر نہ آیا، اس عید پر آنا تھا، مگر شہادت کی خبر ملی۔ نائیک توقیر عباس شہید کی بیٹی پاک فوج کا حصہ بن کر والد کے نقش قدم پر چلنا چاہتی ہے۔
بیٹے کے بغیر عید ادھوری لگے گی،والد سپاہی عاطف خان شہید
عید کے موقع پر سپاہی عاطف خان شہید کے لواحقین نے اپنے جذبات کا اظہار کیا ہے۔ والد نے کہا کہ عید قرباں کا سارا انتظام پہلے میرا بیٹا کرتا تھا۔ اس بار بیٹے کے بغیر عید ادھوری ہے۔ محلے کے لوگ آج بھی سپاہی عاطف خان شہید کی محبت اور خدمت کو یاد کرتے ہیں۔
شہید کے بھائی نے کہا کہ عاطف خان ہر عید پر فجر کی نماز کے بعد ہمارے ساتھ وقت گزارتا۔ بھائی چھٹی آتا تو امی اس کے پسندیدہ کھانے بناتی تھیں۔ مجھے فخر ہے کہ میرے بھائی نے وطن کی خاطر جان دی۔
سپاہی محمد ثقلین شہید کے لواحقین کا پیغام
دفاع وطن کیلئے جانوں کا نذرانہ پیش کرنے والوں کو قوم بھولی ہے نہ کبھی بھولے گی۔ پاک فوج کے سپاہی محمد ثقلین شہید کے اہلخانہ کہتے ہیں شہید کا وارث ہونا بہت بڑا فخر ہے۔
سپاہی محمد ثقلین شہید کے لواحقین نے عید قرباں کے موقع پر اپنے پیارے کو یاد کرتے ہوئے اپنے جذبات بھی بیان کیے ہیں ۔ شہید کے والد نے کہا کہ بیٹے کی ہمیشہ خواہش ہوتی تھی کہ وہ عید گھر والوں کے ساتھ گزارے۔ اس مرتبہ میں اپنے بیٹے کے نام پر دو قربانیاں دے رہا ہوں۔ ہمیں فخر ہے کہ ہمارا بیٹا پاک وطن کے لئے شہید ہوا۔ سپاہی محمد ثقلین شہید کے بھائی کا کہنا تھا کہ عید کے دن بھائی سارے بچوں کو سیر کیلئے لے کر جاتے تھے۔
