خیبرپختونخوا کے ضلع مردان میں گھر میں سیلنڈر دھماکے میں ایک ہی خاندان کے 6 افراد جاں بحق ہوگئے۔
افسوسناک واقعہ نے عیدالاضحیٰ کی خوشیاں سوگ میں بدل دیں۔ گزشتہ شب آرم کالونی میں گھر کے اندر گیس سلنڈر دھماکے کے نتیجے میں دو منزلہ مکان کی چھت منہدم ہوگئی۔
دھماکے کے وقت گھر میں موجود خاتون اور بچوں سمیت 8 افراد ملبے تلے دب گئے۔ ریسکیو اہلکاروں نے 7 گھنٹے کے طویل ریسکیو آپریشن کے بعد 6 افراد کی لاشیں اور دو زخمیوں کو نکال لیا گیا۔
ڈسٹرکٹ ایمرجنسی آفیسر سید شعیب منصور کے مطابق جاں بحق ہونے والوں میں 36 سال کا فواد اُن کی اہلیہ، 7 سال کا بیٹا ریان، 4 سال کی بیٹی عائزہ، 25 سال کا شاہ فہد اور 8 سال کی طوبہ شامل ہیں۔ زخمی ہونے والوں میں 5 سال کی عائشہ اور 5 سال کی دعا شامل ہیں۔
ریسکیو آپریشن میں ریسکیو 100 سے زائد اہلکاروں نے حصہ لیا، آپریشن میں بھاری مشینری استعمال کی گئی۔ جاں بحق افراد کی نماز جنازہ ادا کر کے انہیں آبائی قبرستان میں سپرد خاک کر دیا گیا۔
