ملک بھر میں آج عیدالاضحیٰ مذہبی جوش و جذبے اور عقیدت و احترام کے ساتھ منائی جا رہی ہے۔
کراچی، لاہور، اسلام آباد، پشاور، کوئٹہ سمیت تمام بڑے شہروں اور دیہی علاقوں میں نمازِ عید کے چھوٹے بڑے اجتماعات کا انعقاد کیا گیا۔ جہاں لوگوں نے ایک دوسرے کو عید کی مبارکباد دی اور خوشیوں میں شریک ہوئے۔
وفاقی دارالحکومت کی فیصل مسجد میں نماز عید کا سب سے بڑا اجتماع، لاہور میں داتا دربار، مینار پاکستان، جامعہ نعیمیہ اور منصورہ میں نماز عید ادا کی گئی۔
علما نے فلسفہ قربانی پر روشنی ڈالی، ملکی سلامتی اور خوشحالی کیلئے دعائیں بھی کی گئی۔ نمازِ عید کی ادائیگی کے بعد سنتِ ابراہیمی کی پیروی کرتے ہوئے ملک بھر میں جانوروں کی قربانی کا سلسلہ جاری ہے۔
عید کے اجتماعات کے موقع پر سیکیورٹی کے بھی سخت انتظامات کیے گئے تھے۔ حساس مقامات پر پولیس اور رینجرز کی اضافی نفری تعینات کی گئی جبکہ سی سی ٹی وی کیمروں کے ذریعے بھی نگرانی کی جاتی رہی تاکہ شہری بلا خوف و خطر عبادات اور قربانی کی ادائیگی کر سکیں۔
