پاکستان کرکٹ بورڈ (پی سی بی) نے وائٹ بال کرکٹ کے ٹاپ پرفارمرز کو تین روزہ مختصر کیمپ کے لیے لاہور طلب کر لیا ہے۔ ذرائع کے مطابق کیمپ 3، 4 اور 5 جون کو تین مختلف گروپس کی صورت میں منعقد ہوگا۔
ذرائع کا کہنا ہے کہ کیمپ میں کھلاڑیوں کی فٹنس اور حالیہ کارکردگی کا تفصیلی جائزہ لیا جائے گا، جبکہ پی سی بی کی جانب سے آئندہ کے لائحہ عمل پر بھی کھلاڑیوں کو اعتماد میں لیا جائے گا۔
22 کھلاڑیوں کو اس کیمپ میں شامل کیا گیا ہے، جن میں کپتان بابر اعظم، محمد رضوان، شاہین شاہ آفریدی کے علاوہ پی ایس ایل اور ڈومیسٹک کرکٹ کے نمایاں پرفارمرز بھی شامل ہیں۔
سینیئر کھلاڑی تینوں گروپس کے مختلف سیشنز میں شرکت کریں گے۔ ذرائع کے مطابق ہیڈ کوچ مائیک ہیسن دیگر کوچز کے ہمراہ کھلاڑیوں سے ملاقات کریں گے اور مستقبل کی منصوبہ بندی پر گفتگو کریں گے۔
