پنجاب کے صوبائی وزیر اقلیتی امور سردار رمیش سنگھ اروڑا نے بھارتی پنجاب کے عوام کو پیغام دیا ہے کہ ’ پورا بھارتی پنجاب یاد رکھے کہ پاکستان آپ پر حملہ نہیں کرے گا ‘۔
لبرٹی چوک لاہور میں سماء کے سینئر اینکر پرسن ندیم ملک سے خصوصی گفتگو کرتے ہوئے صوبائی وزیر اقلیتی امور سردار رمیش سنگھ اروڑا نے بھارتی میڈیا کے امرتسر اور دیگر شہروں پر پاکستانی حملوں سے متعلق پراپیگنڈے کو مسترد کرتے ہوئے کہا کہ ’ ہم یہ سوچ بھی نہیں سکتے کہ بھارتی پنجاب، جہاں پر ہمارے سکھ بھائی بستے ہیں اور وہ جو پہلے دن سے کہہ رہے ہیں کہ وہ پاکستان کے ساتھ ہیں، اس لیے پاکستان کے ساتھ ہیں کہ پاکستان کے اندر ان کا ننکانہ صاحب ہے، پاکستان کے اندر ان کا کرتار پور صاحب ہے، ہم سوچ بھی نہیں سکتے کہ ہم ان پر حملہ کریں گے ‘۔
سردار رمیش سنگھ نے کہا کہ ’ ہم نے کوئی حملہ نہیں کیا، یہ منفی پراپیگنڈہ ہے، جو بھارت ایک لمبے عرصے سے کر رہا ہے اور پچھلے تین دن سے تو انتہا کردی ہے ‘۔
انہوں نے بھارتی میڈیا کو مخاطب کرتے ہوئے کہا کہ ’ بھارتی میڈیا کو ہوش کے ناخن لینے چاہییں ‘۔
ان کا کہنا تھا کہ ’ پاکستانی میڈیا بھی بات کر رہا ہے لیکن وہ نہ تو سنسنی پھیلا رہا ہے اور نہ کوئی ڈھونگ یا ڈرامہ رچا رہا ہے ‘۔
