معروف ریسلر و اداکار جان سینا نے کوڈی روڈز کو شکست دے کر ریکارڈ 17ویں بار ڈبلیو ڈبلیو ای چیمپئن بننے کا اعزاز اپنے نام کرلیا۔
دنیا بھر میں مقبول ریسلر اور اداکار جان سینا 2025ء میں کسی وقت ریسلنگ کی دنیا کو ہمیشہ کیلئے خیرباد کہہ دیں گے، مگر اس سے پہلے انہوں نے ڈبلیو ڈبلیو ای کا ایک ایسا ریکارڈ اپنے نام کرلیا ہے جو اب تک کوئی اور ریسلر نہیں حاصل کرسکا۔
جان سینا نے ریسل مینیا 41 کے دوسری رات کے مین ایونٹ میں تاریخ رقم کرتے ہوئے کوڈی روڈز کو شکست دی اور ریکارڈ 17 ویں بار ڈبلیو ڈبلیو ای چیمپئن بن گئے۔ یہ پہلی بار ہے جب ڈبلیو ڈبلیو ای میں کوئی ریسلر 17 ویں بار چیمپئن بنا۔
اس سے قبل رک فلیئر اور جان سینا مشترکہ طور پر سب سے زیادہ 16 بار چیمپئن بننے کا اعزاز حاصل کرچکے تھے۔
جان سینا نے ڈبلیو ڈبلیو ای کی تاریخ کے سب سے طویل عرصے تک فیس یا ہیرو جیسی شخصیت رہنے کے بعد ہیل بن کر نیا عالمی ریکارڈ قائم کیا تھا۔
جان سینا 2 دہائیوں سے زائد عرصے تک ڈبلیو ڈبلیو ای میں ایک مثبت سوچ یا رویے کا مظاہرہ کرنیوالے ریسلر کے طور پر سرگرم رہے مگر ایلیمینیشن چیمبر میچ کے بعد انہوں نے اچانک روڈی کوڈز پر حملہ کیا اور دی راک کے ساتھی بن کر خود کو ڈرامائی انداز سے تبدیل کرلیا۔
اپنے کیرئیر میں آخری بار جان سینا اس طرح کے ولن ریسلر 2003ء میں بنے تھے اور 6 نومبر 2003ء کو ہیرو کے روپ میں بدلنے کے بعد وہ 7786 دنوں تک مثبت ریسلر کے طور پر مداحوں کے سامنے رہے، اس طرح ان کا نام دوسری بار گنیز ورلڈ ریکارڈز میں شامل ہوگیا۔
ریسل مینیا 41 میں بھی جان سینا کی کامیابی صاف نہیں تھی بلکہ انہوں نے چیمپئن شپ بیلٹ کو استعمال کرکے اسے ممکن بنایا۔ کوڈی روڈز ریسل مینیا 40 میں چیمپئن بنے تھے اور ایک سال سے زائد عرصے بعد انہیں چیمپئن شپ سے محروم ہونا پڑا۔
ایک موقع پر کوڈی روڈز نے جان سینا کو شکست دیدی تھی جب ایک گلوکار ٹریوس اسکاٹ نے مداخلت کرکے ریفری کو باہر کھینچ لیا اور جان سینا شکست سے بچ گئے۔
