قومی ایئر لائن (پی آئی اے) کی لاہور سے باکو کے لئے پروازوں کا آغاز ہوگیا۔
پی آئی اے کی پہلی پرواز پی کے ون فائیو نائن لاہور سے 152 مسافروں کو لے کر روانہ ہوئی۔ پرواز کی روانگی سے قبل لاہور ایئرپورٹ پر تقریب ہوئی جس میں وزیردفاع خواجہ آصف نے بحیثیت مہمان خصوصی شرکت کی۔ اس موقع پر پاکستان میں آذربائیجان کے سفیر خضر فرہاد وف اور وزارت ہوابازی کے اعلیٰ حکام بھی شریک تھے۔
خواجہ آصف نے کہا کچھ عرصہ قبل لوگوں کا خیال تھا کہ پی آئی اے مشکل سے کبھی باہر نہیں نکل سکے گی مگر وزیراعظم شہباز شریف کی زیر قیادت جامع اصلاحاتی پروگرام کے بعد آج پی آئی اے اپنے قدموں پر کھڑی ہے۔
ان کا مزید کہنا تھا کہ پی آئی اے اپنے نیٹ ورک کو وسعت دے رہا اور باکو اس سلسلے کی ایک کڑی ہے، پروازوں سے پاکستان آذربائیجان کے تعلقات مستحکم ہوںگے۔
