یوکرین میں موجود بھارتی سفارتخانے نے دعویٰ کیا ہے کہ روس کے ایک میزائل حملے میں کیف میں واقع ایک بھارتی دوا ساز کمپنی ’’کسُم‘‘ کے گودام کو نشانہ بنایا گیا ہے۔ یوکرینی سفارتخانے نے ہفتے کے روز الزام عائد کیا کہ ماسکو نے بھارت کے ساتھ ”خصوصی دوستی“ کے باوجود دانستہ طور پر بھارتی کاروبار کو نشانہ بنایا۔
یوکرینی سفارتخانے نے ایک ٹویٹ میں کہا کہ آج روسی میزائل نے یوکرین میں بھارتی دوا ساز کمپنی کسُم کے گودام کو نشانہ بنایا، ماسکو ایک طرف بھارت سے خصوصی دوستی کا دعویٰ کرتا ہے، دوسری جانب بھارتی کاروبار کو جان بوجھ کر نشانہ بنا رہا ہے، بچوں اور بزرگوں کیلئے مخصوص ادویات کو تباہ کر دیا گیا۔
برطانیہ کے یوکرین میں سفیر مارٹن ہیریس نے بھی کہا ہے کہ روسی حملے میں کیف میں ایک بڑی دوا ساز کمپنی کا گودام تباہ کر دیا گیا تاہم ان کے بیان میں کمپنی کے نام کا ذکر نہیں اور کہا گیا ہے کہ حملہ ڈرون کے ذریعے کیا گیا۔
ہیریس نے ایک تصویر بھی شیئر کی جس میں گودام سے دھواں اٹھتا دیکھا گیا اور جائے وقوعہ پر فائر بریگیڈ موجود نظر آتی ہے۔
روس یا بھارت کی حکومت کی جانب سے تاحال اس واقعے پر کوئی باضابطہ تبصرہ سامنے نہیں آیا۔
روسی وزارت دفاع نے دعویٰ کیا ہے کہ یوکرین نے گزشتہ 24 گھنٹوں کے دوران روس کی توانائی تنصیبات پر 5 حملے کیے، جو دونوں ممالک کے درمیان امریکی ثالثی میں ہونے والے معاہدے کی خلاف ورزی ہے، جس کے تحت توانائی تنصیبات کو نشانہ نہ بنانے پر اتفاق ہوا تھا۔
یاد رہے کہ فروری 2022ء میں روس کی یوکرین پر جارحیت کے بعد سے دونوں ممالک کے درمیان جنگ جاری ہے، تاہم بھارت نے کسی ایک فریق کی حمایت کرنے کے بجائے دونوں ممالک کے ساتھ متوازن تعلقات برقرار رکھے ہیں۔
وزیراعظم نریندر مودی نے گزشتہ ماہ ایک پوڈ کاسٹ میں کہا تھا کہ جنگ کسی مسئلے کا حل نہیں اور وہ دونوں ممالک کے صدور سے براہ راست بات کر کے جنگ بندی پر زور دے چکے ہیں۔
