مسلم لیگ ( ن ) کے قائد اور سابق وزیر اعظم نواز شریف کا کہنا ہے کہ ن لیگ نے عوام کے ریلیف اور ملک کی خدمت کو ہمیشہ مقدم رکھا ہے۔
بدھ کے روز سابق وزیر اعظم نواز شریف سے وفاقی وزیر توانائی اویس لغاری نے ملاقات کی جس کے دوران سابق وزیر اعظم نے بجلی کی قیمتوں میں کمی پر مبارکباد دی اور کہا کہ وزیراعظم شہباز شریف اور ان کی ٹیم کو شاباش دیتا ہوں جنھوں نے بجلی کی قیمتوں میں کمی کرکے عوام کو ریلیف دیا۔
سابق وزیر اعظم کا کہنا تھا کہ آئی ایم ایف پروگرام میں ہوتے ہوئے بجلی کی قیمتوں میں کمی آسان کام نہیں تھا۔
نواز شریف کا کہنا تھا کہ عوام کی آسانی میرے دل کا سکون ہے ، اللہ تعالیٰ کا شکر ہے کہ عوام سے کئے وعدے پورے ہو رہے ہیں ، مسلم لیگ ن نے عوام کے ریلیف اور ملک کی خدمت کو ہمیشہ مقدم رکھا ہے اور یہی ہماری روایت ہے یہی ہماری سیاست ہے۔
اس موقع پر اویس لغاری کا کہنا تھا کہ آپ کی رہنمائی نے وزیراعظم شہباز شریف اور ان کی ٹیم کو کامیاب کیا۔
اویس لغاری نے نواز شریف کو توانائی کے شعبے میں اصلاحات، اوپن مارکیٹ کے قیام سے بجلی مزید سستی کرنے، بجلی چوری اور گردشی قرض سے مستقل نجات پر اقدامات سے آگاہ بھی کیا۔
