سماجی رابطے کے پلیٹ فارم ایکس نے پیمنٹ سروس کو جلد متعارف کرانے کا فیصلہ کر لیا۔
ایلون مسک کافی عرصے سے ایکس (ٹوئٹر) کو چین کی وی چیٹ ایپ کی طرز پر ڈھالنے کی خواہش ظاہر کر رہے تھے اور اب اس سلسلے میں اہم پیش رفت سامنے آئی ہے۔
سوشل میڈیا پلیٹ فارم کی جانب سے "ایکس منی" کے نام سے پیمنٹ سروس شروع کی جا رہی ہے جس کا مقصد صارفین کو مالیاتی لین دین کی سہولت فراہم کرنا ہے۔
اس اقدام کا بنیادی ہدف مالیاتی ٹرانزیکشنز کو ایکس پلیٹ فارم کا حصہ بنانا ہے تاکہ اسے ایک سپر ایپ میں تبدیل کیا جا سکے۔
ایکس منی کے آفیشل اکاؤنٹ کے مطابق یہ سروس صارفین کے تمام مالیاتی معاملات کا حل پیش کرے گی جس سے ظاہر ہوتا ہے کہ متعدد پیمنٹ فیچرز متعارف کرائے جائیں گے۔
ایکس کی سی ای او لنڈا یاکارینو نے حال ہی میں بتایا کہ ایکس منی کا پہلا سرکاری شراکت دار "ویزا" ہوگا اور اس تعاون سے صارفین ویزا ڈائریکٹ کے ذریعے رقوم بھیجنے اور وصول کرنے کے قابل ہوں گے۔
ایکس منی صارفین کو ڈیبٹ کارڈ کے ذریعے سروس سے منسلک ہونے کی سہولت دے گی جبکہ بینک اکاؤنٹس میں براہ راست رقم ٹرانسفر کرنے کا آپشن بھی میسر ہوگا۔
یہ سروس سب سے پہلے امریکا میں شروع کی جائے گی جس کے بعد دیگر خطوں میں توسیع کی جائے گی اور اس کا انحصار متعلقہ علاقوں میں قانونی اور مالیاتی منظوریوں پر ہوگا۔
