پاکستان کرکٹ بورڈ کی جانب سے پاکستان سپر لیگ (پی ایس ایل) 10 کا ترانہ نامور گلوکار علی ظفر کی آواز میں جلد جاری کیا جائے گا جس پر ملتان سلطانز کے مالک علی ترین نے مایوسی کا اظہار کردیا۔
فوٹو اینڈ ویڈیو شیئرنگ پلیٹ فارم انسٹاگرام پر ملتان سلطانز کے مالک نے اپنے اعتراض کا اظہار کھل کر کیا ہے۔
علی ترین نے پی ایس ایل کو تنقید کا نشانہ بناتے ہوئے انسٹا اسٹوری شیئر کی ہے۔ ملتان سلطانز کے مالک نے اپنی مایوسی کا اظہار کرتے ہوئے سوال کیا کہ پی ایس ایل نئے ٹیلنٹ کو سامنے لانے کے بجائے ایک ہی فنکار پر انحصار کیوں کرتا ہے؟۔
انہوں نے لکھا کہ پاکستان کے پاس بہت سارے حیرت انگیز فنکار ہیں، پھر بھی تقریباً آدھے سے زیادہ ترانے ایک ہی ’’درمیانی عمر‘‘ کے گلوکار کو دے دیے گئے، اس کے باوجود کہ فرنچائزز کو فنکار کے حوالے سے تحفظات ہیں۔
علی ترین نے لکھا ہے کہ وہ اسے اب تک کا سب سے بڑا پی ایس ایل قرار دے رہے ہیں لیکن پھر بھی انہی آوازوں کو ری سائیکل کرکے پیش کر رہے ہیں۔
خیال رہے کہ پاکستان کرکٹ بورڈ نے پی ایس ایل 10 کے آفیشل ترانے کے گلوکار کا اعلان ایک پوسٹر شیئر کرکے کیا، جس کے مطابق اس سال بھی نوجوانوں کے پسندیدہ گلوکار علی ظفر پی ایس ایل کے گانے میں آواز کا جادو جگائیں گے۔
پاکستان کے مقبول ترین گلوکاروں میں سے ایک علی ظفر اس سے قبل بھی متعدد بار پی ایس ایل کا ترانہ گا چکے ہیں۔
گزشتہ سیزن میں بھی پی ایس ایل اینتھم ’’کُھل کے کھیل‘‘ میں انہوں نے ہی اپنی آواز کا جادو جگایا تھا۔
واضح رہے کہ پاکستان سپر لیگ سیزن 10 کا آغاز 11 اپریل سے ہوگا، ایونٹ میں 18 مئی تک کراچی، لاہور، ملتان اور راولپنڈی میں میچز کھیلے جائیں گے۔
