پاکستان میں سوشل میڈیا پلیٹ فارم ایکس کی فوری بحالی مزید مشکل ہوگئی۔ پی ٹی اے اور غیرملکی کمپنی کی انتظامیہ کے درمیان معاملات طے نہ ہوسکے۔
پی ٹی اے نے حکومتی یا عدالتی احکامات کے بغیر ازخود سروس بحال نہ کرنے کا فیصلہ کرلیا۔ پی ٹی اے ذرائع کے مطابق حکومت یا عدالتی احکامات کے بغیر سروس بحالی کا کوئی امکان نہیں۔
ذرائع کے مطابق ایکس پاکستان میں رجسٹریشن اور مقامی قوانین کی پاسداری سے بدستور انکاری ہے، جس کے باعث پی ٹی اے نے ملک میں ایکس کی سروسز خود بحال نہ کرنے کا فیصلہ کرلیا۔
نمائندہ خصوصی سماء سے گفتگو میں پی ٹی اے حکام نے ایکس کے حوالے سے پالیسی واضح کردی۔ حکام کے مطابق پابندی کے بعد ایکس انتظامیہ کے ساتھ متعدد بار خط و کتابت ہوئی۔ ایکس کے قواعد و ضوابط پاکستانی قوانین سے متصادم ہے جس کے سبب معاملہ حل نہ ہو سکا۔
پی ٹی اے حکام کے مطابق وزارت داخلہ کی ہدایت پر ایکس سروس کو 17 فروری 2024 کو بلاک کیا تھا، ایکس کو متعدد بار غیرقانونی آن لائن مواد ہٹانے اور بلاک کرنے کا کہا گیا تھا۔ ایکس نے ہدایات پر عمل کیا نہ ہی سروس بحالی کی کوئی باضابطہ درخواست دی، وزارت داخلہ نے بھی ایکس کی بحالی کے لیے کوئی ہدایات نہیں دیں۔
