پاکستان کی ون ڈے کرکٹ ٹیم کے کپتان محمد رضوان نے ڈومیسٹک پریکٹس میچ کے دوران چھکا مار کر فاسٹ بولر نسیم شاہ کا موبائل فون توڑ دیا۔
یہ واقعہ ایل سی سی اے میں اس وقت پیش آیا جب قومی ٹیم نیوزی لینڈ کے خلاف آئندہ تین ون ڈے میچوں کی سیریز کی تیاریوں میں مصروف تھی۔
ایک وائرل ویڈیو میں دیکھا جا سکتا ہے کہ رضوان کریز سے باہر نکل کر شاٹ کھیلتے ہیں اور گیند سیدھا ڈریسنگ روم کی طرف جا کر نسیم شاہ کے فون سے ٹکراتی ہے جو کرسی پر رکھا ہوا تھا۔
نسیم شاہ نے فوراً فون چیک کیا لیکن ان کے چہرے کے تاثرات سے لگا کہ فون ناکارہ ہو چکا تھا۔
دوسری جانب پاکستان کا ون ڈے اسکواڈ نیوزی لینڈ کے خلاف سیریز کے لیے تیاری کر رہا ہے لیکن ٹیم کو تجربہ کار اوپنرز فخر زمان اور صائم ایوب کے بغیر جانا پڑے گا جو دونوں انجری کا شکار ہیں۔
پاکستان کا ون ڈے اسکواڈ 23 مارچ کو نیوزی لینڈ روانہ ہوگا، جہاں تین میچوں کی سیریز 29 مارچ سے 5 اپریل تک کھیلی جائے گی۔
