وزیراعظم شہباز شریف کا کہنا ہے کہ ملکی معیشت صحیح سمت کی طرف گامزن ہے، شرح سود اور مہنگائی کی شرح میں خاطر خواہ کمی آچکی ہے، ملک میں سرمایہ کاری ہوگی تو باہر سے بھی آئے گی، زراعت اور انڈسٹری کی ترقی ہمارا ہدف ہے، چاول کی برآمد 4 ارب ڈالر تک پہنچ چکی ہے۔
وزیراعظم سے ملکی مایہ ناز کاروباری شخصیات کے وفد نے وزیر اعظم ہاؤس میں ملاقات کی، کاروباری برادری نے وزیراعظم کی قیادت میں حکومت کی پالیسیوں پر اعتماد کا اظہار کیا اور کاروباری برادری و سرمایہ کاروں کیلئے سازگار ماحول فراہم کرنے پر خراج تحسین پیش کیا۔
وزیراعظم شہباز شریف نے کاروبار شخصیت کی آمد کا خیر مقدم کرتے ہوئے کہا کہ مخلص اور دیانتدار کاروباری برادری ہمارا قیمتی اثاثہ ہے، آپ سب نے مشکل وقت میں بھی صنعتی و معاشی ترقی کیلئے اپنا سرمایہ اس ملک میں لگایا، آپ کی کاوشوں کی بدولت ملک کی معیشت کا پہیہ چلا، لوگوں کو روزگار ملا، آپ کی مشاورت سے معیشت کی بہتری، تمام شعبوں میں اصلاحات کا سفر جاری رکھیں گے۔
ان کا کہنا تھا کہ الحمدللہ ملکی معیشت صحیح سمت کی طرف گامزن ہے، شرح سود اور مہنگائی کی شرح میں خاطر خواہ کمی آچکی ہے، حکومت ملک میں کاروباری سرگرمیوں اور سرمایہ کاری کیلئے سازگار ماحول فراہم کررہی ہے، سرمایہ کاری کا سفر مقامی سرمایہ کاروں سے شروع ہوتا ہے، ملک میں سرمایہ کاری ہوگی تو باہر سے بھی آئے گی۔
وزیراعظم نے مزید کہاکہ زراعت اور انڈسٹری کی ترقی ہمارا ہدف ہے، معیشت کا پہیہ تیزی سے گھمانے کیلئے ہم نے آپ کا ساتھ دینا ہے، چاول کی برآمد 4 ارب ڈالر تک پہنچ چکی ہے، چین نے فری لیب گرانٹ دی جو کراچی میں دفن ہوگئی، اس تباہی کا ذمہ داری کون ہے؟، تالی دونوں ہاتھوں سے بجتی ہے، اس طرح کام نہیں چلے گا۔
شہباز شریف کا کہنا ہے ک آئندہ ہفتے سے سیکٹر وائز اجلاس کرینگے، ہفتہ میں 2 بار میٹنگ ہوگی، سیکٹر کو 4 لوگ لیڈ کریں گے، حکومتی ارکان بھی شامل ہوں گے، کوئی گپ شپ نہیں صرف فیصلے کئے جائیں گے۔
