لاہور کے میو اسپتال میں اچانک دورے کے دوران ادویات کی عدم فراہمی پر وزیراعلیٰ پنجاب نے ایم ایس کو عہدے سے ہٹادیا، مریم نواز نے مریضوں کی شکایات اور صفائی ستھرائی کے ناقص انتظامات پر سخت برہمی کا بھی اظہار کیا۔
وزیراعلی پنجاب مریم نواز نے میو اسپتال کے اچانک دورہ کیا، اس موقع پر ادویات کی عدم فراہمی کا انکشاف ہوا، ایم ایس کوعہدے سے ہٹاتے ہوئے ادویات کی 100 فیصد فراہمی یقینی بنانے کا حکم دیدیا۔
ذرائع کے مطابق وزیراعلیٰ پنجاب مریم نواز نے ایم ایس سے سوال کیا کہ ادویات کیوں دستیاب نہیں، جواب ملا کہ ادویات ساز کمپنیوں کے بلز کلئیر نہیں ہوسکے، جس پر وزیراعلیٰ پنجاب نے فوری واجبات کی ادائیگی کیلئے اقدامات کا حکم دیدیا اور ساتھ ہی ایم ایس میو اسپتال کو فوری عہدے سے ہٹادیا۔
وزیراعلیٰ بولیں شکر کریں آپ کو گرفتار نہیں کروا رہی، میو اسپتال میں زیر علاج مریضوں اور لواحقین نے سرنج تک نہ ملنے کی شکایات کیں، مریم نواز نے کارڈیالوجی میں کیڑوں کی موجودگی کی شکایت پر برہمی کا اظہار کیا۔
وزیراعلیٰ پنجاب نے کہا کہ شہری علاج کی توقع لیکر اسپتال آتے ہیں، کس وارڈ میں کیا ہورہا ہے انتظامیہ لاعلم ہے، جو عوام کے ساتھ ہورہا ہے ذمہ داروں کے اپنوں کے ساتھ ہو تو پتہ چلے۔
وزیر اعلیٰ پنجاب نے شہریوں کے مسائل کے فوری حل کی یقین دہانی کروائی۔
وزیراعلیٰ کی سرزنش کے بعد محکمہ صحت پنجاب میں میو اسپتال معاملے پر اعلیٰ سطح اجلاس ہوا، میو اسپتال کے ایم ایس کے ساتھ چیف ایگزیکٹو ڈاکٹر احمد نعمان کو بھی معطل کرنے کی سفارش کی گئی۔
اسپتال انتظامیہ اور محکمہ صحت نے ایک دوسرے پر الزامات لگائے۔ اجلاس میں وزیر صحت پنجاب، سیکریٹری صحت، وائس چانسلر کنگ ایڈورڈ میڈیکل یونیورسٹی بھی شریک ہوئے، میو اسپتال کے دیگر انتظامی افسران کو بھی معطل کرنے کی سفارش کی گئی۔
میو اسپتال انتظامیہ نے کہا کہ کئی خط لکھے گئے مگر کمپنیوں کے فنڈز کلئیر نہیں ہوئے۔ محکمہ صحت افسران نے کہا کہ اسپتال کے پاس فنڈز موجود تھے، ہمیں معاملے سے آگاہ نہیں کیا گیا۔
وزیر صحت پنجاب نے کہا کہ وزیراعلی پنجاب خوش نہیں، مزید دوستی نہیں نبھاؤں گا۔ انہوں نے پنجاب کے تمام اسپتالوں کے دورے کرنے کا فیصلہ کرلیا۔
