اسلام آباد میں وزیراعظم شہباز شریف سے متحدہ عرب امارات اور الیریا گروپ کے آٹھ رکنی وفدنے ملاقات کی، جس میں پاکستان کے خصوصی اقتصادی زونز میں سرمایہ کاری کے مواقع پر تفصیلی تبادلہ خیال کیا گیا۔
ملاقات کے دوران پاکستان اور متحدہ عرب امارات کے درمیان ایک مفاہمتی یادداشت (MoU) پر دستخط کیے گئے، جس کے تحت یو اے ای پاکستان کے اسپیشل اکنامک زونز میں مختلف منصوبوں میں سرمایہ کاری کرے گا۔
وزیراعظم شہباز شریف نے اس موقع پر کہا کہ پاکستان میں سرمایہ کاری کے بے شمار مواقع موجود ہیں اور حکومت سرمایہ کاری دوست ماحول فراہم کرنے کے لیے ترجیحی بنیادوں پر اقدامات کر رہی ہے۔
متحدہ عرب امارات کے وفد نے وزیراعظم کی زیر قیادت پاکستان کے معاشی استحکام کی تعریف کی اور کہا کہ پاکستان خطے میں سرمایہ کاری کے لیے ایک موزوں ترین مارکیٹ کے طور پر ابھر رہا ہے وفد نے پاکستان میں اپنی سرمایہ کاری کو مزید وسعت دینے میں گہری دلچسپی کا بھی اظہار کیا۔
