سیکیورٹی ذرائع کے مطابق بنوں میں فتنہ الخوارج کے دہشت گردوں کا بنوں کینٹ پر بزدلانہ حملہ ناکام بنا دیا گیا ہےافطار کے وقت جب بازار میں رش تھا، دہشت گردوں نے بارود سے بھری دو گاڑیاں بنوں کینٹ کی دیوار سے ٹکرانے کی کوشش کی۔
سیکیورٹی ذرائع کی جانب سے فراہم کر دہ معلومات کے مطابق حملے میں 9 معصوم شہری شہید جبکہ 16 افراد زخمی ہو گئے دہشت گردوں نے ایک بارود سے بھری گاڑی بازار کے قریب دھماکے سے اڑا دی، جس کے نتیجے میں شہریوں کی شہادت کے ساتھ ساتھ ایک قریبی مسجد بھی شہید ہو گئی۔
سیکیورٹی ذرائع کا کہنا ہے کہ رمضان المبارک کے مقدس مہینے میں افطار کے وقت معصوم شہریوں اور مسجد کو نشانہ بنانے سے واضح ہوتا ہے کہ ان دہشت گردوں کا اسلام سے کوئی تعلق نہیں۔
سیکیورٹی فورسز کی فوری جوابی کارروائی سے دہشت گرد اپنے مذموم مقاصد میں کامیاب نہ ہو سکے۔ حکام نے واضح کیا ہے کہ تمام دہشت گردوں کے خاتمے تک کلیرنس آپریشن جاری رہے گا۔
صدر مملکت آصف علی زرداری کی شدید مذمت
صدر مملکت آصف علی زرداری نے بنوں کینٹ پر دہشت گرد حملے کی شدید مذمت کرتے ہوئے قیمتی انسانی جانوں کے نقصان پر گہرے دکھ اور افسوس کا اظہار کیا ہےاور شہداء کے درجات کی بلندی اور اہل خانہ کے لیے صبر جمیل کی۔
آصف علی زرداری کا کہنا تھا کہ رمضان المبارک کے مقدس مہینے میں افطار کے وقت ایسا گھناؤنا حملہ قابل مذمت ہے پوری قوم ایسی مذموم کارروائیوں کو مسترد کرتی ہے اور دہشت گردی کے خلاف متحد ہے۔
صدر آصف علی زرداری نے سیکیورٹی فورسز کی بروقت کارروائی کو سراہتے ہوئے دہشت گردوں کو جہنم واصل کرنے پر خراج تحسین پیش کیا ہےفتنہ الخوارج کی سرکوبی کے لیے کارروائیاں جاری رکھی جائیں گی اور ملک دشمن عناصر کے مکمل خاتمے تک سیکیورٹی ادارے پرعزم رہیں گے۔
وزیراعظم شہباز شریف کی بنوں کینٹ حملے کی شدید مذمت، سیکیورٹی فورسز کو خراجِ تحسین
وزیراعظم شہباز شریف نے بنوں کینٹ پر فتنہ الخوارج کے دہشت گرد حملے کو ناکام بنانے اور حملہ آوروں کو ہلاک کرنے پر سیکیورٹی فورسز کو زبردست خراجِ تحسین پیش کیا۔
وزیراعظم میاں محمد شہباز شریف نے سیکیورٹی فورسز کے افسران اور جوانوں کی بہادری کو سراہتے ہوئے کہا کہ پاکستان کی بہادر افواج اور سیکیورٹی ادارے دہشت گردوں کے عزائم خاک میں ملانے کی بھرپور صلاحیت رکھتے ہیں۔
وزیرِاعظم نے حملے میں معصوم شہریوں کی شہادت پر گہرے رنج و غم کا اظہار کرتے ہوئے شہداء کے اہل خانہ سے دلی ہمدردی کا اظہار کیا اور ان کے درجات کی بلندی کی دعا کی۔ زخمیوں کی جلد صحتیابی کے لیے نیک خواہشات کا اظہار کرتے ہوئے انہیں بہترین طبی سہولیات فراہم کرنے کی ہدایت کی۔
شہباز شریف نے کہا کہ رمضان المبارک کے مقدس مہینے میں معصوم شہریوں کو نشانہ بنانے والے بزدل دہشت گرد کسی رعایت کے مستحق نہیں،فتنہ الخوارج کی مکمل سرکوبی تک جنگ جاری رہے گی اور پوری قوم اپنی سیکیورٹی فورسز کے ساتھ کھڑی ہے۔
وزیر داخلہ کا بنوں کینٹ میں دہشت گرد حملہ ناکام بنانے پر سیکیورٹی فورسز کو خراج تحسین
وزیر داخلہ محسن نقوی نے بنوں کینٹ میں دہشت گرد حملے کو ناکام بنانے پر سیکیورٹی فورسز کو خراج تحسین پیش کیا ہے کہا کہ سیکیورٹی اہلکاروں نے بہادری اور پیشہ ورانہ مہارت کا مظاہرہ کرتے ہوئے دشمن کے ناپاک عزائم کو ناکام بنایا۔
وزیر داخلہ نے حملے میں شہید ہونے والے افراد کے اہل خانہ سے دلی ہمدردی اور تعزیت کا اظہار کرتے ہوئے کہا کہ حکومت غمزدہ خاندانوں کے دکھ میں برابر کی شریک ہے زخمیوں کی جلد صحت یابی کے لیے دعا بھی کی۔
محسن نقوی نے حملے میں قیمتی انسانی جانوں کے ضیاع پر گہرے دکھ اور افسوس کا اظہار کرتے ہوئے کہا کہ دہشت گرد عناصر کے خلاف کارروائیاں جاری رکھی جائیں گی اور ملک میں امن و امان کو ہر قیمت پر یقینی بنایا جائے گا۔
وزیر اعلیٰ خیبر پختونخوا علی امین گنڈا پور کی بنوں دھماکے کی مذمت، واقعے کی رپورٹ طلب
پشاور: وزیر اعلیٰ خیبر پختونخوا علی امین گنڈا پور نے بنوں دھماکے کی شدید مذمت کرتے ہوئے کہا کہ پولیس کے اعلیٰ حکام سے واقعے کی فوری رپورٹ جمع کروائیں۔دھماکے میں قیمتی انسانی جانوں کے ضیاع پر گہرے دکھ اور افسوس کا اظہار کیا شہداء کے لواحقین سے دلی ہمدردی اور تعزیت کی۔ شہداء کے بلند درجات اور پسماندگان کے لیے صبرِ جمیل کی دعا کی۔
علی امین گنڈا پور نے کہا کہ رمضان المبارک کے مقدس مہینے میں اس طرح کے واقعات نہ صرف قابل مذمت بلکہ انتہائی افسوسناک بھی ہیں صوبے میں امن و امان کو یقینی بنانے کے لیے ہر ممکن اقدامات کیے جائیں گے۔
