لاہور کے فورٹریس اسٹیڈیم میں ہارس اینڈ کیٹل شو کی اختتامی تقریب شاندار انداز میں منعقد ہوئی، وزیراعلیٰ پنجاب مریم نواز کی میزبانی میں ہونے والی اس تقریب کے مہمانِ خصوصی آرمی چیف جنرل سید عاصم منیر تھے، جنہیں رینجرز کے جوانوں نے سلامی پیش کی۔
فورٹریس اسٹیڈیم لاہور میں ہونے والی ہارس اینڈ کیٹل شو کی اختتامی تقریب کا آغاز وزیراعلیٰ پنجاب مریم نواز نے کیا، جس میں سینیئر وزیر مریم اورنگزیب، وزیر برائے ہاؤسنگ سوسائیٹی بلال یاسین، وزیر بلدیات ذیشان رفیق اور وزیر قانون صہیب بھرت سمیت سینئر حکام اور عوام کی بڑی تعداد شریک ہوئی۔
تقریب میں پنجاب کی ثقافت کو اجاگر کرنے کے لیے نیزہ بازی، گھڑ رقص اور کبڈی جیسے روایتی کھیلوں کا انعقاد کیا گیا پنجاب گرین اور وائٹ کے درمیان دلچسپ کبڈی میچ نے حاضرین کی توجہ حاصل کر لی۔
اس موقع پر ٹینٹ پیگرز، ڈانسنگ اونٹ اور مختلف شہروں سے لائے گئے خوبصورت جانور سلامی کے چبوترے کے سامنے سے گزرے، جبکہ گھوڑوں نے ڈھول کی تھاپ پر روایتی رقص بھی پیش کیا۔
تقریب میں اسموگ فری پنجاب کے تھیم پر مبنی فلوٹس بھی پیش کیے گئے جو ماحولیات سے متعلق حکومت پنجاب کی کاوشوں کو اجاگر کر رہے تھے موسیقی کے رنگ بکھیرتے ہوئے معروف گلوکار راحت فتح علی خان اور عارف لوہار نے اپنی پرفارمنس سے حاضرین کو جھومنے پر مجبور کر دیا۔
ہارس اینڈ کیٹل شو کی یہ اختتامی تقریب پنجاب کی ثقافت اور روایات کو زندہ رکھنے کی شاندار مثال بنی ہے جس میں شرکاء نے بھرپور دلچسپی کا اظہار کیا۔
