پاکستان تحریک انصاف آج صوابی میں پاور شو کرے گی جس کیلئے پنڈال سج گیا ہے، کارکنوں کی آمد کا سلسلہ بھی جاری ہے۔ جلسے میں مرکزی و صوبائی قائدین کارکنوں سے خطاب کریں گے۔
انتظامیہ کے مطابق صوابی میں پی ٹی آئی کے جلسے کیلئے تمام تر تیاریاں مکمل کر لی گئی ہیں، 80 فٹ چوڑا اور 40 فٹ اونچا سٹیج بنا دیا گیا، پنڈال میں لائٹس لگ چکی، پنڈال میں 8 ہزار سے زیادہ کرسیاں لگائی جائیں گی، جلسے کی سکیورٹی کیلئے 1300 اہلکار ڈیوٹی دیں گے۔
وزیراعلیٰ خیبرپختونخوا علی امین گنڈاپور نے کہا ہے کہ بانی پی ٹی آئی عمران خان کی کال پر یوم سیاہ منا رہے ہیں، پورے ملک میں پی ٹی آئی کارکنان کے ساتھ عوام بھی احتجاج کر رہے ہیں، یوم سیاہ تاریخ میں سنہری الفاظ میں لکھا جائے گا۔
ان کا کہنا تھا کہ فارم 47 کی نا اہل حکومت نے پاکستان کے ہر ادارے کو تباہ کر دیا، 26 نومبر اور 9 مئی کے واقعات میں ملوث حکومت جودیشل کمیشن بنانے سے ڈرتی ہے۔
دوسری جانب ملتان میں شاہ محمود قریشی کی صاحبزادی مہر بانو قریشی کو دفعہ 144 کی خلاف ورزی کرنے پر گرفتار کرلیا گیا۔
مظفرآباد میں بھی تحریک انصاف نے آزادی چوک پر مظاہرہ کیا۔ پولیس اور کارکنان میں تصادم کے بعد قائد حزب اختلاف قانون سازاسمبلی خواجہ فاروق احمد کو حراست میں لے لیا گیا ۔ سندھ کے شہر کشمور پی ٹی آئی کی ریلی لائن پرانی روڈ سے مین روڈ پہنچی توپولیس نے آگے جانے سے روک دیا۔
