پاکستان مسلم لیگ (ن) کے صدر نوازشریف کا کہنا ہے کہ عوام ان کی طاقت اور عزت ہیں،عوام کی مشکلات میں کمی آ رہی ہے،مریم نواز شریف کی محنت سے پنجاب میں بہتری نظرآرہی ہے۔
ن لیگ کے صدر نوازشریف اور وزیراعلیٰ پنجاب سے مختلف اضلاع کے ارکان پنجاب اسمبلی نے ملاقات کی ہے۔ ملک کی مجموعی صورتحال، عوام کے مسائل اور حلقوں میں ترقیاتی کاموں پر گفتگو ہوئی، ارکان اسمبلی نے بہترین کارکردگی پر وزیراعلیٰ پنجاب کو خراج تحسین پیش کیا۔
نوازشریف نے عوام کی مشکلات کو مزید کم کرنے کی ہدایت کرتے ہوئے کہا کہ آپ سب میری طاقت اور عزت ہیں،مریم نواز کی محنت سے پنجاب میں بہتری نظرآرہی ہے۔ ملاقات کرنےوالوں میں راولپنڈی، اٹک، مری، چکوال، وزیرآباد، حافظ آباد اور منڈی بہاؤ الدین کےارکان اسمبلی شامل تھے۔
وزیر اعلیٰ پنجاب مریم نوازنے کہا کہ ہماری کارکردگی پر سب سے بڑا چیک عوام اور نوازشریف ہیں،وزیراعلیٰ نے راولپنڈی رنگ روڈ دسمبر تک اور راولپنڈی اور گوجرانوالہ ڈویژن کے ترقیاتی منصوبے بروقت مکمل کرنے کی ہدایت کی۔
اراکین اسمبلی کا کہنا تھا کہ مریم نواز نے نواز شریف اور شہباز شریف کے دور اور کارکردگی کی یاد تازہ کر دی ہے،صحت تعلیم،زراعت کے انقلابی منصوبوں پر وزیراعلیٰ شاباش کی مسحتق ہیں۔ سیاسی تعصبات سے پاک شفافیت اور میرٹ پر ترقیاتی کاموں کی تکمیل خوش آئند اور مثبت سیاسی روایت ہے۔
