آرمی چیف جنرل عاصم منیر کا کہنا ہے کہ دوست نما دشمن جان لے مسلح افواج اور قوم کے عزم سے اسے شکست ہوگی، تعاقب کرکے دشمن کو نشانہ بنائیں گے، دہشت گردی میں ملوث غیرملکی آقاؤں کے آلۂ کاروں کو بخوبی جانتے ہیں، دوہری پالیسی پر چلنے والوں سے آگاہ ہیں۔
آرمی چیف جنرل عاصم منیر نے ہفتہ کو بلوچستان کا دورہ کیا، جہاں انہیں سیکیورٹی صورتحال پر جامع بریفنگ دی گئی، بریفنگ میں سینیئر عسکری اور انٹیلی جنس حکام بھی شریک ہوئے۔
پاکستانی فوج کے شعبہ تعلقات عامہ (آئی ایس پی آر) کے مطابق آرمی چیف، گورنر اور وزیراعلیٰ بلوچستان نے قلات کے علاقے منگچر میں شہید سیکیورٹی اہلکاروں کی نماز جنازہ میں شرکت کی اور زخمیوں کی عیادت کیلئے سی ایم ایچ کا دورہ کیا۔
دورہ بلوچستان کے موقع پر آرمی چیف جنرل عاصم منیر نے کہا کہ ہم غیر ملکی آقاؤں کے آلۂ کار بن کر دہشت گردی کرنے والوں سے آگاہ ہیں، ان عناصر نے منافقت کا لبادہ اوڑھ کر دوہرا معیار اپنا رکھا ہے، یہ لوگ جہاں کہیں بھی ہوں ہم ان کا پیچھا کریں گے، قوم اور مسلح افواج کی ثابت قدمی سے انہیں شکست دیں گے۔
ان کا مزید کہنا تھا کہ ہم مادر وطن کے دفاع اور عوام کے تحفظ کیلئے ہم یقیناً دہشت گردوں کا سراغ لگا کر انہیں کیفر کردار تک پہنچائیں گے، دوست نما دشمن کچھ بھی کرلیں، ملک کی قابل فخر مسلح افواج سے انہیں یقیناً شکست ہوگی۔
واضح رہے کہ آئی ایس پی آر کے مطابق 31 جنوری اور یکم فروری کی درمیان رات بلوچستان کے ضلع قلات کے علاقے منگچر میں دہشت گردوں نے روڈ بلاک کرنے کی کوشش کی تھی، فورسز اور قانون نافذ کرنے والے اداروں کو فوری طور پر متحرک کیا گیا جنہوں نے مقامی آبادی کے تحفظ کو یقینی بناتے ہوئے کارروائی کے دوران 12 دہشت گردوں کو ہلاک کردیا۔
فوج کے شعبہ تعلقات عامہ نے بیان میں مزید بتایا تھا کہ آپریشن کے دوران 18 جوانوں نے بہادری سے لڑتے ہوئے اپنی جان دے دی۔
