وفاقی تحقیقاتی ایجنسی (ایف آئی اے) نے ترکیہ میں شہری کے اغوا اور تشدد میں ملوث گینگ کے سرغنہ سمیت دو ملزمان کو گرفتار کرلیا۔ ملزمان شہریوں کو ملازمت کے نام پر بیرون ملک بھجوا کر یرغمال بناتے اور تاوان وصول کرتے تھے۔
ایف آئی اے نے انسانی اسمگلنگ میں ملوث گروہ کے سرغنہ شہزاد اور اس کے ساتھی غلام فاروق کو ہری پور میں چھاپہ مار کر گرفتار کیا۔ گرفتار ملزمان اغواء، تشدد اور انسانی اسمگلنگ میں ملوث پائے گئے جبکہ شہزاد کا نام مطلوب انسانی اسمگلروں کی فہرست میں شامل تھا۔
ایف آئی اے کے مطابق شہزاد ترکی میں مقیم انسانی اسمگلر زاہد خان کا پارٹنر تھا اور پاکستان سے انسانی اسمگلنگ کا نیٹ ورک چلا رہا تھا۔ ملزمان شہریوں کو ملازمت کے بہانے بیرون ملک بھجوا کر یرغمال بناتے۔ تشدد کرتے اور ان کے گھر والوں سے تاوان وصول کرتے تھے۔
گرفتار ملزم غلام فاروق بغیر لائسنس کے ٹریول ایجنسی چلا رہا تھا۔ ایف آئی اے نے اس کے قبضے سے تین پاسپورٹ اور دیگر شواہد برآمد کر لیے ہیں۔
