وزیراعظم شہبازشریف کا کہنا ہے کہ ملک دشمن عناصر کو معاشی استحکام اور ترقی ہضم نہیں ہو رہی۔ مخصوص ٹولہ بار بار اسلام آباد پر چڑھائی کی کوشش کرتا ہے۔
وزیر اعظم شہباز شریف نے پاکستان براڈکاسٹرز ایسوسی ایشن کے وفد سے ملاقات میں سیاسی اور معاشی معاملات پر اظہار خیال کیا۔ کہا کہ ملک کو ڈیفالٹ سے بچا کر معاشی استحکام تک لے آئے ہیں ۔ اڑان پاکستان مقامی طور پر تیار کردہ ملکی ترقی کا منصوبہ ہے۔ اس کو میڈیا اور تمام اسٹیک ہولڈرز کے تعاون سے کامیاب بنائیں گے۔ ملک دشمن مخصوص ٹولہ باربار اسلام آباد پر چڑھائی کی کوشش کرتا ہے ۔ ان سے پاکستان کا معاشی استحکام اور ترقی ہضم نہیں ہو رہی ۔
شہباز شریف نے کہا کہ ملک میں اظہار رائے کی مکمل آزادی، میڈیا کو ریاست کا چوتھا ستون مانتے ہیں۔ حکومتی پالیسیوں پر تعمیری تنقید کا خیرمقدم کریں گے۔ کہا کہ میاں نواز شریف کی قیادت میں معاشی استحکام کے بعد ترقی کا سفر زور و شور سے جاری ہے۔ ترقی کے منصوبے اڑان پاکستان کو میڈیا اور دیگر اسٹیک ہولڈرز کے تعاون سے کامیاب بنائیں گے ۔ دوست اور برادر ممالک کا شکریہ کہ انہی کے تعاون سے پاکستان ڈیفالٹ کے دہانے سے واپس آکر ترقی کی طرف گامزن ہوا ۔۔۔۔ ملک دشمن ٹولہ بار بار اسلام آباد پر چڑھائی کی کوشش کرتا ہے ۔ ان عناصر کو پاکستان کا معاشی استحکام اور ترقی ہضم کرنا مشکل ہو رہا ہے ۔
وزیراعظم کا مزید کہنا تھا کہ پاکستان کی معاشی سلامتی کیلئے اپنی سیاست کی قربانی دی ۔ مہنگائی اور شرحِ سود میں خاطرخواہ کمی کا سہرا معاشی ٹیم کو جاتا ہے ۔ برآمدات میں اضافہ ، صنعتی اور زرعی ترقی کاروبار دوست پالیسیوں کا نتیجہ ہے۔ ایف بی آر کی مکمل ڈیجیٹلائزیشن پر کام تیزی سے جاری ہے ۔۔۔ کسٹمز سسٹم کی بہتری کیلئے فیس لیس اسیسمنٹ کا نظام شروع کیا جا چکا ۔۔۔ اس سے محصولات میں اضافہ اور کرپشن کا خاتمہ ہوگا ۔ اسمگلنگ روکنے سے قومی خزانے کو فائدہ پہنچا۔ ترسیلاتِ زر میں اضافہ بیرون ملک مقیم پاکستانیوں کے حکومتی پالیسوں پر بھرپور اعتماد کا عکاس ہے ۔
وزیراعظم نے بتایا کہ چین پاکستان اقتصادی راہداری کے ثمرات ملنا شروع ہو گئے ہیں ۔ نواز شریف اور چینی صدر کا خواب تعبیر کے بالکل قریب، سی پیک کے منصوبوں کی جلد تکمیل کیلئے حکومت دن رات کوشاں ہے۔ دہشت گردی کی جنگ میں پوری قوم نے قربانی دی ۔ افواج پاکستان سمیت پوری قوم اس ناسور کے ملک سے مکمل خاتمے تک اس کے خلاف جنگ جاری رکھے گی ۔
پی بی اے وفد نے بجلی کی قیمتوں کو کم کرنے اور آئی پی پیز کے ساتھ معاملات کو خوش اسلوبی سے طے کرنے پر وزیرِاعظم کی کاوشوں کو سراہا ۔ اور کہا کہ حکومت ملک میں سیاسی استحکام کیلئے کوششیں کرے ۔ میڈیا ملکی ترقی اور گورننس کی بہتری میں اپنا مثبت کردار ادا کرتا رہے گا۔
