اداکارہ نیلم منیر نے گزشتہ روز دبئی میں رشتہ ازدواج میں بندھنے کی تصاویر شیئر کیں جو سوشل میڈیا پر وائرل ہورہی ہیں۔
سوشل میڈیا پر جاری تصاویر میں نیلم منیر کو سفید رنگ کا عروسی جوڑا زیب تن کیے دیکھا جاسکتا ہے جبکہ ان کے شوہر سفید رنگ کے روایتی عربی جبے یا ثوب میں ملبوس نظر آرہے ہیں، تاہم نیلم منیر کی جانب سے شوہر کا نام یا ان کی کوئی تفصیل شیئر نہیں کی گئی۔
اب یوٹیوبر یاسر شامی نے اپنے سوشل میڈیا اکاؤنٹ پر ایک ویڈیو میں نیلم منیر کے شوہر کے حوالے سے کئی تفصیلات شیئر کی ہیں۔
یوٹیوبر کے مطابق نیلم منیر کے شوہر کا نام محمد راشد ہے جو دبئی پولیس کے سی آئی ڈی ڈپارٹمنٹ میں کام کرتے ہیں، ان کی نیلم منیر سے پسند کی شادی ہے، شادی کی تقریب گزشتہ ماہ منعقد ہوئی جس کا شوٹ اب ریلیز کیا گیا ہے۔
یوٹیوبر نے اداکارہ کے شوہر کی ملازمت کے حوالے سے دعویٰ کرتے ہوئے بتایا کہ نیلم منیر کے شوہر دبئی پولیس میں ہیں اور اگر دبئی پولیس کے موجود اہلکاروں کا تجربہ 2 سے 3 سال کا ہو تو ان کی تنخواہ 13ہزار درہم ہوتی ہے، جو (پاکستانی 10 لاکھ روپے) بنتی ہے، اگر ان اہلکاروں کا تجربہ 5 سے 8 سال کا ہو تو معاوضہ 18 ہزار درہم (یعنی 13 سے 14 لاکھ روپے) تک بنتا ہے لیکن اگر دبئی پولیس اہلکاروں کا تجربہ 8 سے 10 سال کا ہو تو ان کی تنخواہ 22 ہزار درہم یعنی 16 سے 17 لاکھ پاکستانی روپے تک ہوتی ہے۔
یاسر شامی کا کہنا ہے کہ عام طور پر دبئی اپنے ملک میں شادی کرنیوالی لڑکیوں کو شہریت نہیں دیتا، اس کے بجائے انکو گولڈن ویزہ دیا جاتا ہے جو کہ دبئی میں مستقل سکونت اختیار کرنے پر مستقبل میں شہریت میں بھی بدل سکتا ہے لیکن اگر ان دونوں کے بچے ہوں گے تو انہیں دبئی کی شہریت ہی ملے گی۔
دوسری جانب یہ بھی کہا جارہا ہے کہ نیلم منیر کے شوہر دبئی کے ایک بزنس مین ہیں۔
