وفاقی وزیر سرمایہ کاری بورڈ، مواصلات اور نجکاری عبدالعلیم خان کی زیر صدارت اجلاس میں آئندہ 3 سال کے دوران پاکستان اور قازقستان کے درمیان تجارت کے حجم میں 100 فیصد اضافہ کرنے پر اتفاق ہوگیا۔
اسلام آباد میں وفاقی وزیر سرمایہ کاری بورڈ، مواصلات اور نجکاری عبدالعلیم خان کی زیر صدارت پاکستان اور قازقستان کے درمیان تجارت کے فروغ کے لیے اہم اجلاس منعقد ہوا جس میں قازقستان کے سفیر یرزہان کستافن نے خصوصی شرکت کی۔
عبدالعلیم خان نے کہا کہ پاکستان اور قازقستان آئندہ تین سالوں میں دو طرفہ تجارت کے حجم میں 100 فیصد اضافہ کریں گے۔ انہوں نے کہا کہ غیر ملکی سرمایہ کاروں کی ضروریات کو ایک ہی مرکز میں پورا کیا جائے گا تاکہ سہولت فراہم کی جا سکے۔
قازقستان کے سفیر یرزہان کستافن نے پاکستان میں ڈسپلے سینٹرز کے قیام میں گہری دلچسپی ظاہر کی اور مکمل تعاون کی یقین دہانی کرائی۔ اجلاس میں فیصلہ کیا گیا کہ ٹیکسٹائل، سرجیکل آلات،کھیلوں کے سامان، ہینڈی کرافٹس،چمڑے کی مصنوعات اور زرعی آلات کو ان ڈسپلے سنٹرز میں نمائش کے لیے رکھا جائے گا۔
وفاقی وزیر نے کہا کہ پاکستان قازقستان سے ایک سال میں اپنی برآمدات میں بیس فیصد اضافہ کرنے کا خواہاں ہے اور وسط ایشیائی ممالک کے ساتھ بھی مشترکہ کاروباری حکمت عملی اپنائی جائے گی۔
انہوں نے بتایا کہ الماتے باکو اور دیگر بڑے شہروں میں پاکستان اپنی مصنوعات کی نمائش کے مراکز قائم کرے گا۔ ہر ملک کی طلب کے مطابق ڈسپلے سینٹرز کے لیے پالیسی تشکیل دی جائے گی تاکہ بزنس کمیونٹی کو سہولت دی جا سکے۔
قازقستان کے سفیر نے دو طرفہ تعاون میں گہری دلچسپی لینے پر عبدالعلیم خان کا شکریہ ادا کیا۔ اجلاس میں قازقستان میں تعینات پاکستانی سفیر۔۔ وفاقی سیکرٹریز اور سینئر افسران نے بھی شرکت کی اور اہم امور پر بریفنگ دی۔
