گوادر یونیورسٹی میں سول انتظامیہ اور پاک فوج کی معاونت سے منعقدہ دو روزہ بزنس اینڈ کلچرل گالا میں طلبا و طالبات نے بھرپور شرکت کی۔
تقریب کا مقصد سی پیک ،خطے کی کاروباری صلاحیتوں اور ثقافتی ورثے کو اجاگر کرنا تھا تاکہ تعلیم، کاروبار اور مقامی آبادی کے لیے ایک مشترکہ پلیٹ فارم مہیا کیا جاسکے۔
تقریب میں اعلی سول وعسکری حکام، یونیورسٹی آف گوادرکے فیکلٹی ممبران اور انتظامیہ سمیت لوگوں کی کثیر تعداد نے شرکت کی۔
بزنس اینڈ کلچرل گالا میں یونیورسٹی سمیت دیگر تعلیمی اداروں کے طلباء و طالبات نے مختلف قسم کے اسٹال لگائے جن میں بزنس ایگزیبشنز، اسٹارٹ اپس، جدید مصنوعات اور خدمات سے متعلق مقامی کاروبار شامل تھے۔
گالا میں روایتی بلوچی موسیقی، رقص، دست کاری، خطے کے ورثے کو اجاگر کرنے والے کاروبار اور ثقافتی تحفظ سے متعلق پینل مباحثے بھی شامل تھے۔
