عالمی بینک نے رواں مالی سال کےدوران پاکستان کو دو ارب ڈالر فنڈز کی فراہمی کا عندیہ دیدیا۔
نگران وزیر خزانہ شمشاد اخترسے کنٹری ڈائریکٹر عالمی بینک ناجی بنہاسین کی ملاقات میں پاکستان میں اقتصادی سرگرمیوں کے فروغ کے لئے مختلف شعبوں میں تعاون پر تبادلہ خیال ہوا۔
سرکاری اعلامیہ کے مطابق ملاقات میں دوطرفہ تعاون کو مزید وسعت دینے کے لیے مختلف آپشنز پر غور کیا گیا۔ وزیر خزانہ نے عالمی بینک کی ٹیم کو حکومت کے اصلاحاتی ایجنڈے اور معیشت کے استحکام کے لیے جاری کوششوں سے آگاہ کیا۔
وزیر خزانہ نے کہا پاکستان ورلڈ بینک کیساتھ اپنی ترقیاتی شراکت داری کو قدر کی نگاہ سےدیکھتا ہے ، پاکستان کی معاشی ترقی میں عالمی بینک کی انتظامیہ کا کردار قابل ستائش ہے۔
عالمی بینک کے کنٹری ڈائریکٹر نے وزیر خزانہ کو جاری منصوبوں پر بریفنگ دیتے ہوئے کہاکہ عالمی بینک پاکستان کے ساتھ مل کر منصوبوں پرعمل درآمد، کارکردگی کو بہتر بنانے اورغیر ملکی وسائل کی تقسیم کے حجم کو زیادہ سے زیادہ کرنے کی کوششیں کر رہا ہے۔
ناجی بنہاسین نے کہاکہ ان کوششوں کے نتیجہ میں جاری مالی سال کے دوران تقریباً دوارب ڈالر کی معاونت کاہدف ہے۔
