پینتھرز نے چیمپیئنز ون ڈے کپ 2024 کے فائنل کے لیے کوالیفائی کرلیا۔
اقبال سٹیڈیم فیصل آباد میں کھیلے گئے کوالیفائر میچ میں پینتھرز نے مارخورز کو 7 وکٹوں سے شکست دے کر چیمپیئنز ون ڈے کپ کے فائنل کے لئے کوالیفائی کرلیا۔
کوالیفائر میچ میں مارخور نے ٹاس جیت کر پہلے بیٹنگ کا فیصلہ کیا جو اچھا ثابت نہ ہوسکا اور پوری ٹیم 36 اوورز میں محض 137 رنز پر ڈھیر ہوگئی، سلمان آغا 52 رنز کے ساتھ نمایاں بیٹر رہے جبکہ افتخار احمد 39 اور نسیم شاہ 14 رنز کی اننگ کھیل سکے۔
پینتھرز کی جانب سے صائم ایوب نے شاندار باؤلنگ کا مظاہرہ کرتے ہوئے 6 اوورز میں 24 رنز کے عوض 5 کھلاڑیوں کو پویلین کی راہ دکھائی جبکہ محمد حسنین نے 3 اور علی رضا نے ایک وکٹ حاصل کی۔
جواب میں فاتح ٹیم نے 23.4 اوورز میں 3 وکٹوں کے نقصان پر 143 رنز بنا کر مطلوبہ ہدف مکمل کرلیا اور میچ میں 7 وکٹوں سے کامیابی حاصل کر لی۔
فاتح ٹیم کی جانب سے عثمان خان نے ناقابل شکست 54 رنز کی اننگ کھیلی جبکہ عمر صدیق 35 اور صائم ایوب 33 رنز بناسکے۔
مارخورز کی جانب سے عاکف جاوید، سلمان آغا اور زاہد محمود نے ایک، ایک وکٹ حاصل کی۔
