چیئرمین ایچ ای سی ڈاکٹر مختار احمد کی دوبارہ تعیناتی کے خلاف درخواست پر اسلام آباد ہائیکورٹ نے وزیراعظم اور دیگر فریقین کو نوٹس جاری کر دیا۔
اسلام آباد ہائیکورٹ نے چیئرمین ایچ ای سی ڈاکٹر مختار احمد کی دوبارہ تعیناتی کے خلاف درخواست پر وزیراعظم کو بذریعہ پرنسپل سیکرٹری نوٹس جاری کیا ہے۔ عدالت نے وزارت تعلیم اور ڈاکٹر مختار کو بھی نوٹس جاری کرتے ہوئے یکم اکتوبر تک جواب طلب کیا ہے۔
جسٹس میاں گل حسن اورنگ زیب نے سماعت کا حکم نامہ جاری کیا، جس میں بتایا گیا کہ ڈاکٹر مختار کو ایک سال کے لیے دوبارہ چیئرمین ایچ ای سی تعینات کیا گیا۔درخواست گزار کا مؤقف ہے کہ چیئرمین کو دوبارہ اسی عہدے پر تعینات نہیں کیا جا سکتا۔
وکیل کے مطابق تعیناتی کا اشتہار جاری ہوا تھا مگر بغیر کسی وجہ کے اس پر عمل روک دیا گیا اور بعد ازاں ڈاکٹر مختار کو دوبارہ تعینات کر دیا گیا۔ عدالت نے فریقین کو شق وار جواب جمع کرانے کا حکم دیتے ہوئے آئندہ سماعت یکم اکتوبر کو مقرر کر دی ہے۔ یہ درخواست اسلامیہ کالج پشاور کے ایسوسی ایٹ پروفیسر نے دائر کی ہے۔
