چیمپئنز ون ڈے کپ ٹورنامنٹ کے پہلے میچ میں مارخورز نے پینتھرز کو 160 رنز سے شکست دے دی۔
جمعرات کو فیصل آباد میں کھیلے گئے ایونٹ کے پہلے میچ میں پینتھرز نے ٹاس جیت کر پہلے فیلڈنگ کا فیصلہ کیا اور مارخورز کو بیٹنگ کی دعوت دی۔
پہلے بیٹنگ کرتے ہوئے مارخورز نے مقررہ 50 اوور میں 6 وکٹوں کے نقصان پر347 رنز بنائے۔
مارخورز کی جانب سے کامران غلام نے 102 گیندوں پر 115 کی شاندار اننگ کھیلی جبکہ عبدالصمد نے 25 گیندوں پر 62 رنز بنائے۔
پینتھرز کی طرف سے فاسٹ باؤلر محمد حسنین اور مبصر خان نے 2، 2 کھلاڑیوں کو پویلین کی راہ دکھائی۔
پینتھرز کی ٹیم ہدف کے تعاقب میں 35 ویں اوور میں 187 رنز ڈھیر ہوگئی۔
عماد بٹ 77 رنز کی اننگ کھیل کر نمایاں رہے جبکہ مبصر خان نے 33 رنز بنائے۔
مارخورز کی جانب سے نسیم شاہ اور عاکف جاوید نے 3،3 کھلاڑیوں کو آؤٹ کیا۔
