چیمپئنزون ڈے کپ کےکپتانوں اوراسکواڈز کا اعلان کردیا گیا،شاہین آفریدی،سعود شکیل، شاداب خان، محمد رضوان اورمحمد حارث چیمپئنز کپ کی پانچ ٹیموں کے کپتان مقرر کیے گئے ہیں۔
پاکستان کرکٹ بورڈ نے آج پانچ چیمپئنز ون ڈے کپ ٹیموں کے کپتانوں کے ساتھ ساتھ 12 سے 29 ستمبر تک فیصل آباد میں منعقد ہونے والے ٹورنامنٹ کے لیے عارضی اسکواڈز کا اعلان کر دیا ہے۔
کپتانوں کا تقررپانچ ٹیموں کے مینٹور نے کیا،مصباح الحق (وولوز)، ثقلین مشتاق (پینتھرز)، سرفراز احمد (ڈولفنز)، شعیب ملک (اسٹالینز) اور وقار یونس (لائنز) کے مینٹور ہیں۔
پاکستان کےٹیسٹ نائب کپتان سعود شکیل کو ڈولفنز کا کپتان مقررکیا گیا،شاہین شاہ آفریدی لائنز کی قیادت کریں گے اورپینتھرز کی قیادت شاداب خان کریں گے۔ پاکستان شاہینز کے کپتان محمد حارث اسٹالینز کی قیادت کریں گے جبکہ محمد رضوان وولوز کی قیادت کریں گے۔
چیمپئنز ون ڈےکپ میں ملک کےبہترین کرکٹرز شرکت کریں گے۔ 50 اوورز کا یہ ٹورنامنٹ سنگل لیگ فارمیٹ میں کھیلا جائے گا۔تمام میچ دوپہر 3 بجے شروع ہوں گے، سوائے 16 ستمبر کو لائنز بمقابلہ پینتھرز کے میچ کے، جو صبح 9:30 بجے شروع ہوگا۔
ٹورنامنٹ کا اختتام چار دنوں میں تین پلے آف میچوں کے ساتھ ہوگا، جس کا اختتام اتوار، 29 ستمبر کو فائنل میں ہوگا۔
12 ستمبرکو افتتاحی میچ میں مصباح الحق کی وولوز کا مقابلہ ثقلین مشتاق کی پینتھرز سے ہوگا۔
