حساس مقامات پر تعینات پولیس اہلکاروں کی حفاظت کیلئے محکمہ داخلہ پنجاب نے انسپکٹر جنرل ( آئی جی ) کو مراسلہ ارسال کر دیا ۔
وزیراعلیٰ پنجاب کی ہدایت پر محکمہ داخلہ نے آئی جی پنجاب کو اہم مراسلہ جاری کیا ہے جس میں ہدایت کی گئی ہے کہ حساس مقامات پر تعینات پولیس اہلکاروں کی حفاظت کیلئے انتظامات میں اضافہ کیا جائے ۔
چیک پوسٹس ، ناکوں پر تعیناتی اور چھاپے یا سیکیورٹی آپریشن کےدوران پولیس اہلکارمکمل سیفٹی گیئر استعمال کریں ۔
پولیس اہلکاروں کے سر، گردن اور چھاتی کو خاص طور پر مناسب حفاظتی سامان سے محفوظ بنایا جائے اور حساس آپریشنز اور ڈیوٹی کے دوران بلٹ پروف جیکٹ اور ہیلمٹ کا استعمال یقینی بنایا جائے ۔
مراسلے میں ہدایت کی گئی ہے کہ تمام آر پی اوز، سی پی اوز اور ڈی پی اوز اپنے زیر نگرانی عملے کی حفاظت کیلئے اقدامات اٹھائیں اور وزیر اعلیٰ پنجاب کے احکامات پر من و عن عملدرآمد یقینی بنایا جائے ۔
