پارلیمنٹ ہاؤس کے ملازمین کے سیاسی سرگرمیوں میں ملوث ہونے کا انکشاف ہوا ہے۔ اسپیکر قومی اسمبلی سردار ایاز صادق نے ڈپٹی سارجنٹ ایٹ آرمز سجاد احمد خان کو شوکاز نوٹس جاری کر دیا۔
سجاد احمد خان کو سیاسی سرگرمیوں میں ملوث ہونے پر چارج شیٹ جاری کر دی گئی، جبکہ چار دیگر ملازمین کو حتمی وارننگ دی گئی ہے۔ سجاد احمد خان نے تحریک انصاف کے دھرنے میں اپنے علاقے کے لوگوں کو بٹھایا تھا ۔ سجاد خان کی ڈیوٹی اپوزیشن لیڈر عمر ایوب کے چیمبر میں تھی ۔
ذرائع قومی اسمبلی کے مطابق منع کرنے کے باوجود ڈپٹی سارجنٹ ایٹ آرمز علاقے کے لوگوں کو دھرنے میں لاتے رہے ۔ چار دیگر ملازمین کی ڈیوٹی سابق اسپیکر اسد قیصر کے ساتھ تھے۔
ذرائع کے مطابق قومی اسمبلی کے ملازم ہوتے ہوئے یہ خود بھی دھرنے میں شامل رہے۔ ترجمان قومی اسمبلی نے بھی ڈپٹی سارجنٹ ایٹ آرمز کو چارج شیٹ اور چار ملازمین کو وارننگ کی تصدیق ہے۔
