انٹرنیٹ اسپیڈ کی سست روی اور فائروال انسٹالیشن کے خلاف درخواست پر اسلام آباد ہائیکورٹ نےفریقین کو نوٹس جاری کرکے پیر تک جواب طلب کرلیا۔
چیف جسٹس عامر فاروق نے دوران سماعت استفسار کیا کہ کیا آج کل انٹرنیٹ سست ہوگیا ہے۔ اس سے پہلے کہ ہم کوئی آرڈر جاری کریں، یہ بتائیں کہ دراصل ہوکیا رہا ہے۔ کون سی وزارت اس سے متعلقہ ہے۔ پتہ چلے کہ انٹرنیٹ اسپیڈ میں کمی کی وجہ کیا ہے۔
درخواستگزار کی وکیل ایمان مزاری نے کہا کہ پی ٹی اے اس معاملے پر خاموش ہے۔ چیف جسٹس نے کہا سیکرٹری یا جوائنٹ سیکرٹری میں سے کس کو بلائیں۔ ایمان مزاری نے کہا استدعا ہے کہ متعلقہ وزارتوں کے اعلٰی عہدیداروں کو طلب کیا جائے۔
چیف جسٹس نے جواب دیا اُس کو بلائیں گے جو اس معاملے کا علم رکھتا ہو اور عدالت کو بریف کرسکے۔ عدالت نے فریقین کو نوٹس جاری کرتے ہوئے سماعت پیر تک ملتوی کردی۔
