اسلام آباد ہائیکورٹ نے انٹرنیٹ کی سست روی اور فائر وال کی تنصیب کے خلاف درخواست پر اعتراضات ختم کرکے کل سماعت کے لیے مقرر کرنے کی ہدایت کردی۔
چیف جسٹس عامرفاروق نے رجسٹرار آفس کے اعتراضات کے ساتھ درخواست پرسماعت کی۔ وکیل درخواستگزار ایمان مزاری نے کہا کہ درخواست پر رجسٹرار آفس کے اعتراض ہیں۔
چیف جسٹس نے ریمارکس دئیے کہ اعتراضات کو جوڈیشل سائیڈ پر دیکھیں گے۔ چوتھا اعتراض نامناسب زبان کے استعمال کا ہے۔ وکیل نے بتایا کہ صرف ٹویٹ ساتھ لگایا ہے کوئی نامناسب زبان استعمال نہیں کی۔
عدالت سے استدعا ہے درخواست کل ہی سماعت کے لیے مقرر کی جائے۔ عدالت نے استدعا منظور کرتے ہوئے رجسٹرار آفس کے اعتراضات ختم کرتے ہوئے کیس منگل کو سماعت کے لیے مقرر کرنے کی ہدایت کردی۔
