اسلام آباد ہائیکورٹ نے پی ٹی آئی رہنما شہباز گل کے بھائی کی بازیابی کے لیے دائر درخواست پر سماعت کا تحریری حکم جاری کردیا۔ عدالت نے لاپتہ شہری غلام شبیر کو بازیاب کرا کر 6 اگست تک عدالت میں پیش کرنے کا حکم دیا ہے۔ جسٹس میاں گل حسن اورنگزیب نے غلام شبیر کی بازیابی کیلئے دائر درخواست پر تحریری حکم جاری کیا۔
عدالتی حکم نامے میں کہا گیا ہے کہ فریقین کی جانب سے لاپتا شہری کی بازیابی کے لیے کچھ نہیں کیا گیا۔ جبری گمشدگی کی تمام ترذمہ داری وزیراعظم اور کابینہ پر عائد ہوتی ہے۔ عدالتی حکمنامے کی کاپی پرنسپل سیکرٹری کے ذریعے وزیراعظم کو بھیجنے کی ہدایت کی گئی ہے۔
حکمنامے میں کہا گیا کہ ضروری ہے کہ وزیراعظم ہنگامی اقدامات کے ذریعے جبری گمشدگی کے اس مکروہ عمل کا سدباب کریں۔ سیکرٹری داخلہ تمام وسائل بروئے کار لاتے ہوئے غلام شبیر کی بازیابی اور عدالت پیشی یقینی بنائیں۔
حکم نامے میں لکھا گیا ہے کہ دوران سماعت اسسٹنٹ اٹارنی جنرل، وزارت دفاع، ایف آئی اے اور دیگر اداروں کے نمائندے پیش ہوئے۔ تمام اداروں کے نمائندوں نے یک زبان ہو کر مغوی کے ٹھکانے سے لاعلمی کا اظہار کیا۔ حکومت کی جانب سے مغوی کے ٹھکانے سے لاعلمی کا اظہار جبری گمشدگی کا معاملہ ظاہر کرتا ہے۔
