تحریک انصاف کے رکن قومی اسمبلی چوہدری امتیاز کے پروڈکشن آرڈر کا معاملہ الجھ گیا۔ پنجاب حکومت کی جانب سے مفرور قرار دئیے جانے پر اسپیکر اسمبلی نے پروڈکشن آرڈر جاری نہ کرنے کا فیصلہ کرلیا۔
ذرائع کے مطابق پنجاب حکومت کا جواب اسپیکر قومی اسمبلی ایاز صادق کو موصول ہوگیا جس میں موقف اختیار کیا گیا ہے کہ حاجی امتیاز اس وقت پولیس کی حراست میں نہیں بلکہ مفرور ہیں۔ عدالت پیشی کے بعد پی ٹی آئی کے حامی انہیں پولیس حراست سے چھڑا کر فرار ہوگئے۔
اسپیکر آفس کا مؤقف ہے کہ جب ایم این اے پولیس یا کسی ادارے کی حراست میں نہیں تو پروڈکشن آرڈر کیسے جاری کریں۔ مفرور ایم این اے کے پروڈکشن آرڈر جاری نہیں ہوسکتے۔ تحریک انصاف کے ایم این اے حاجی امتیاز کا تعلق منڈی بہاؤالدین سے ہے۔
چیئرمین تحریک انصاف بیرسٹر گوہر نے حاجی امتیاز کے پروڈکشن آرڈر کا معاملہ قومی اسمبلی میں اٹھایا تھا۔ وزیراعظم نے بھی ان کی گرفتاری کا معاملہ دیکھنے کا وعدہ کیا تھا۔
